#NSS學校
[kcss]
下稱主角為N。
N係我初中嘅數學老師，普通中年男性，望落唔似係惡老師。但係，當上咗幾堂佢嘅數學堂之後，我發覺件事開始唔對路。由小事開始先啦，N嘅派簿方式可謂別具一格，其他老師係派畀頭一個學生等佢哋傳去後面嘅，N就型棍喇，佢會飛簿，而且好鐘意飛簿。
一本A5簿可以畀佢飛去頭一個位，都可以飛去最尾嗰個位，佢自己就嘅話:「我唔係飛簿，係派，咁樣派得快啲。」當佢一飛簿，啲同學就左閃右避，有人咁啱避開本嘢，都有人畀佢飛中個頭，畀其他人笑。啲數簿會喺空中揭開，好似白鴿咁喺課室度飛，跟住跌落地下，本簿嘅同學就要走去執。嗰陣係低from，人笑我又跟住膠笑，全班都喺度笑，個場面真係好荒謬。佢就話自己已經做咗依件事好多年喇🙂
依啲都係小事，N最出名係佢嘅教學效率。
作為一個數學老師，佢會喺堂上不停吹水，一堂35分鐘，得5分鐘教書。對此，佢曾經講過:「如果你覺得數學堂好挽，自然會認真聽嗰5分鐘嘅書啦!如果你覺得數學堂唔好挽，就算我講足全堂，你都唔會認真聽書。」……N都叫過我哋適時叫停佢嘅吹水，不過，我就親眼望住有個同學係咁叫佢講書，叫咗好多次，N都充耳不聞，當聽唔到，繼續吹水，直接到咗最高境界。
作為一個學校嘅職員，N喺堂上同我哋拆解校歌，逐句分析歌詞，又話歌詞唔啱又話歌詞無營養。佢仲話自己以前係男高音，然後即場唱校歌。喂大佬我唔想知啊……
慶幸後來N畀人調咗職，我亦都無再畀佢教喇。當我以為我嘅校園生活開始有番啲陽光嘅時候，時隔4年，N再次番嚟依間學校，做我嘅老師😀喺佢行入門口嗰刻，我終於明白到乜嘢係「暴風雨前的寧靜」。我有預感依班將會變得不幸。
今年學校加咗一科聽OLE嘅科，N就教嗰科，內容大概係關於義工服務嘅。有次網課係全級一齊參加，要開cam，嗰堂之後嘅第二日，班主任同我哋講好多人畀人記咗缺席同違規，叫我哋確認下。我一睇個表真係屌出聲，全班得幾個人無畀人記，其餘全部人都記曬。成級百幾人，N記咗幾十個，半級😀(大部分人都有開cam，露下頭咁啦，嗰排啲規定比較寬鬆，喺所有科嘅老師都無話我哋嘅情況下，N直接記半級人違規同缺席，無原因缺席當曠課。)
可能訓導處都覺得離譜啦，後來一個同學都無追究同記違規。N直接由「玩得嘅老師」成為全級公敵。
OLE嘅內容大概係關於義工服務嘅。一個星期得一堂，咁每一堂都會播片播ppt。每次完咗都要做google from，佢就要你寫低你喺依半個鐘入面，你喺知識上、技能上、態度上有咩學到同領悟到。
每堂，都播差唔多嘅片，但又每堂，都問你一樣嘅問題。仲要有字數下限添。
冇考試嘅OLE只計功課分，變到成班人都不斷讚義工服務有幾好幾好，吹噓義工服務點改變到人改變到自己，但係一切「得着」都係作出嚟，用嚟搏佢個「A」。望住佢個google from後台啲人嘅答案，真係得啖笑。唔係話義工服務唔好，只係咁嘅教學模式完全扭曲咗義工服務本質，口上就話要服務大眾熱心助人，但係心入面跟本一啲都唔係咁諗。經過咗咁多堂，OLE已經成功咁令一眾學生反感義工服務。
多謝你睇到嚟依度