#NSS個人
[Guest] title: 我真係好想有真心frd
小妹今年f4,但係連一個真心、投契frd都無。如標題所見,我真係好想有真心frd,即使係一個都好。
小息(仲面授嗰時)見到身邊既同學個個都同frd玩得好開心、好癲既時候真係好羨慕。而我就只能一個人孤零零坐向角落頭到做功課,做完就求其向書搵數計扮忙。一路做一路聽到身邊D同學喺度笑,又見到隔離班既同學喺門口搵frd,真係有種講唔出既難受。如果咁啱喺走廊見到我D frd(其實大家都唔係好熟)既話,就會傾一兩句,但係好明顯大家都係勉強笑。
雖然我講到D frd咁,但係佢地有時對我都幾好,例如平時功課唔明都會教我。但係就係唔夾,成日都好尷。有D就一時對我好好,一時又唔理我,已讀我。
放學諗住終於可以放鬆下,唔使再理人際關係,ig又推同學既post比我睇,全部都係一大班frd勁開心既相。直至而家網課,D story都係不停tag對方,好多嘢講咁。我知你可能會話明知會唔開心就唔好㩒入去睇,但係如果我唔睇就會同佢哋距離更加遠,佢哋更加發現唔到我既存在(雖然可能其實有冇睇都冇分別)。
我自問待人接物都唔太差(起碼有禮貌),同埋我都有嘗試過主動識人,但係次次都尷尬收場,仲衰過我唔出聲,po story又冇人睇。加上依家已經f4,個個都已經有唒小圈子,變相就更加難融合佢地,最終成為異類。可笑既係仲記得小一嗰陣嘅我係有一大班朋友,次次分組都有人想同我一齊。但係越大就越少,每升一次級就失去幾個frd(我有試過維繫,但係大家都尷尷尬尬咁),去到而家一個都冇,分組更成為我最憎既時候。
對唔住各位,我講嘢1999,好多謝大家睇到最尾。總之我想講既就係:究竟可以點先識到多D朋友?