#NSS學校
[Guest] 校園欺凌（我都晤知算唔算係）
長文慎入
小妹今年f2， 讀緊band 1名校，早排就同11個同學好熟，但係因為種種原因（晤方便講），令到一個又一個同學俾人踢出我哋嘅小圈子。
至於點解我會話係校園欺凌，就係因為有四個同學（簡稱A,B,C,D) 喺學校杯葛、玩挑撥離間。
本來我同A係好好嘅朋友，直至到B嘅出現。B其實為人都算虛偽，成日都同我講佢唔鍾意D，但係喺佢面前扮到好鐘意佢咁。我自己可能大家覺得，中學生少少爭執好正常啫，但係事情冇你哋諗得咁簡單。
好入返正題，咁之前我哋Christmas Party 就要分組，本新我已經搵唒同學一齊一組，點知佢哋原來私低下已經分好唒一組（冇我喺入面）ok 冇問題，我冇話一定要同佢哋一組，咁所以小妹就同左一個冇咁熟嘅friend一組。
未暫停面授課堂嘅時候，我哋基本上每一日都一齊食lunch, 直到有一日佢哋開始唔睬我，我嗰陣都一頭霧水，問心無愧我自己冇做過啲乜嘢，咁我見到佢哋唔睬我，就冇再同佢地一齊食lunch，就自己一個食。我有第二個friend（簡稱E) 同佢哋食lunch，E 就同我講佢哋食飯嘅時候係咁講我壞話。我都明講人壞話係好平常嘅事，所以我都冇擺喺心到。
A 平時都係早過我返學，加上我哋嘅座位又係好近，佢有一日就坐咗喺我個位度同佢啲朋友傾偈，我返到學校之後就好似平時咁樣擺低書包，咁佢自己都企起身，讓返個位俾我。我擺低咗書包之後，佢一腳踩咗黎我隻左腳度（仲要係好大力嗰隻），我就同佢講：「你踩到我，可唔可以縮一縮腳？」咁佢當然就扮佢聽唔到我講嘢，繼續踩啦。過咗一陣，佢先至縮番腳，返返去自己個位。我心諗：一個人到底係幾冇家教，連講對唔住都唔識？我又再一次咁樣忍佢哋。
至於最嚴重嗰次，佢唔單止喺學校杯葛我，仲叫我身邊所有嘅朋友遠離我。估唔到真係有同學信咗佢哋，同我絕咗交🥲。咁我都有send message 問A 做咩要咁對我，同埋解釋返佢誤會咗我嘅事。B 成日都喺度挑撥離間，A 又真係信佢所講嘅嘢🤦🏻♀️。A 就同覆左我: 「你可唔可以俾啲時間我冷靜下？」，咁我就答ok，然後因為我同A一齊補習，而補習老師都知發生咩事，所以我哋就攤出嚟講。我已經同A講對唔住同埋認錯，希望我哋可以修補返關係，因為小妹喺學校嘅人際關係唔係太好。但係A似乎唔想同我做返朋友, 我都知呢啲嘢冇得勉強，但係佢講我壞話講到全班都知，我日日返學面對同學嘅冷嘲熱諷真係好辛苦。有一日因為承受唔到壓力直情係學校個廁所匿埋喊。雖然身邊都有幾個朋友支持我，安慰我話我已經做晒我可以做嘅嘢，剩低嘅係睇吓佢自己想唔想修補關係。
因為就嚟要放假，唔同科目都有group project要做，但係依家係冇人同我一組，我真係好無助，同埋已經驚咗要分組做project。雖然呢件事已經係兩三個月前嘅事，但係每次都有人提起或者我自己諗返起，我都會好唔開心，甚至而家打緊呢篇文嘅我， 成個人喺度震緊（我都唔知點解），完全唔知可以點樣抒發我嘅情緒，我真係好攰。我仲有好幾個禮拜比佢哋搞到失眠……
我明白好多人嘅遭遇仲慘過我，我淨係想沖呢個渠道抒發下我嘅情感。
希望佢可以俾啲意見小妹，要屌嘅話唔該細力啲
好多謝你睇到呢度🙇🏻♀️🙇🏻♀️
Sorry for 1999
Thx admin post ig 🙇🏻♀️