#NSS文化
[#NSS220307B 嘅post 主] Hi 又係我。
#NSS220307B 嘅樓主。
香港係文化沙漠果然名不虛傳。
喺篇文下面我見到好多負評，其實係意料之中嘅事。講真果句其實我篇投稿裏便都已經講話我唔係想要屌鳩任何人，亦都講話明白大家其實係想要鼓勵寫文嘅人，但似乎其實一大堆人錯晒重點。sorry都講咗幾句，大家都係唔收貨，又係話我玻璃心碎。
我寫完今日呢個投稿之後，估計下面又係一堆留言講話「閱」、「skip」。
大家都唔明我嗰個重點其實喺邊，串啲嗰句大家DSE卷一咪就係咁樣拎2架囉，又鍾意淨係睇標題就落定論，睇篇文又唔睇晒，唔會自省其身，淨係一味留言話「唔睇」。
果篇嘅第一段先講話我係回應返大家嘅留言，針對NSS近況做出自己嘅見解。
然後其實下面兩三段我個重心都唔係講緊大家嘅留言唔好，而係講創作艱難，文筆得來不易，同埋本地作者出書困難。
結果大家就先入為主覺得我就一定係屌緊大家，我第一句都已經講咗我唔係呢個意思。
成篇投稿都係表示「創作艱難」，同埋想大家反思我哋有啲咩真正可以幫到一啲好似樓主一樣對創作有熱誠嘅人。
我以為我寫完呢篇文之後下面會有人留言話「無論點我都會買樓主嘅書」、「咁嗰陣時樓主文筆真係好好呀嘛，我好支持佢嘅創作。」、「你咁樣太睇小我哋，我哋係真心支持佢繼續寫文嘅。」
但你話我馬後炮都好，點知咁樣一篇投稿，只係質疑話出書同埋拎五星星好困難，其實已經睇出你哋呢班人嘅本性，你哋開始由「樓主出書我第一個買」轉向「其實我叫佢出書都係講吓笑啫」，根本就係見異思遷，完全成功俾當時樓主見到大家其實留緊啲咩言。
見到困難絕大部份人嘅諗法唔係繼續支持樓主衝過難關，而係即刻縮沙話「我都係講笑啫」，真係同「射後不理」差唔多。
當我喺度質疑緊大家其實係咪真係會支持樓主嘅時候，你哋唔係反駁我嘅質疑，而係都係講「唔好發夢啦」呢啲咁嘅嘢。
有人話我玻璃心碎，但我以前都有試過喺呢度投稿作文，大家都有讚過我5**，當下我就覺得好開心，但係後來又發現似乎大家係見人就讚，一啲實質少少嘅評論都冇，見到書面語就一模一樣comment話「5**」、「出書」，仲有人話睇作文睇得多得滯叫Admin Ban曬文學作品。
但係衰啲講一句，點解我哋選擇放啲文上嚟？而唔係投稿報章？又唔係去小說網站寫？
投稿人哋覺得你冇名氣唔會收，小說網站冇人睇。
我哋真係為咗流量㗎咋，根本大家都唔會想睇文，偶然出嚟投稿大家先會嚟睇。
果然就係文化沙漠。
不過，最後都多謝一啲真係有睇晒成篇文嘅人同埋正面留言嘅人。
唯一慰籍就係：都唔係所有人都係咁嘅……