#NSS家庭
[GUSET] 唔知大家有冇被屋企人疲勞轟炸過？
本身屋企人有抑鬱症，細佬有ADHD，所以我成日都被知要多啲忍耐，當聽唔到、睇唔到就算。問題係依家正值「暑假」，屋企人又wfh，相處時間大大增加，磨擦多咗，冇一日係冇爭執
因為細佬有ADHD，佢係冇時停，從八點起身開始就會有一連串嘅噪音，直到夜晚十二點。佢行路係dum地咁行（辛苦了樓下嘅住戶(@_@)），電視又開到好大聲，不時仲會好大聲咁講嘢。而同佢可唔可以細聲啲，過三十分鐘後又故態復萌。我都明白佢都唔係想有呢個病，所以依家可以無視就無視，實行眼不見為乾淨
屋企人就重男輕女，亦因為細佬嘅爸爸嘅原因，對佢就容忍度無限大，佢嘈，係無所謂，我出聲，係會被人叫收聲。試諗下夜闌人靜嘅時候，正當你想瞓覺嘅時候，突然有人係度大大聲吹水，但嗰個係你屋企人，所以你嘅怨氣係無得發洩。我有同佢反映過幾次，不過最後都係失敗收場，皆因每次都會嘈起身。幾次差啲被人斬，一次去差館，仲有無數次被人打。 久而久之，我學精了，唔好同佢嘈。但佢永遠都係覺得佢永遠是對的，照樣做佢想做嘅嘢。算了，自己未成年，又冇經濟能力，點都係要忍落去
放假想瞓耐啲？簡直係mission impossible。係唔會叫你起身，但不時會有啲噪音傳入耳，想瞓覺難過登天。想溫書？咪傻啦，出面部電視大大聲播緊。想係間房睇下動漫打下機？下一秒就會有人入嚟「提醒」你了。覺又瞓唔到，街又冇得出，係屋企係無聊到極點¯_(ツ)_/¯
日日都無覺好瞓，每日都帶住疲勞起身，又帶住瞓覺。攰，真係好攰。我甚至諗過整傷自己耳仔聾咗就算，不過當諗到會聽唔到新歌，呢種諗法又打消了(^o^)唔知我仲可以頂住啲噪音到幾時，每日對住屋企人對我嚟講都係煎熬。
我嘅訴求係想瞓覺。