#NSS個人
[GUEST] 打第三針
我從來都係寧願打針，都唔想感染。上年78月已經打完兩針，到而家已經過咗好耐防禦力已經下降咗好多，所以其實一直都想打第三針。但係之前政府一直都未開放18歲以下打第三針嘅預約，所以一直都未打，可以話係「你想打針政府又唔俾你打，你唔想打針政府又要逼你打」。
而家香港疫情日漸嚴重，終於開放打針，所以我係開放第一日11/3嘅朝早就已經預約咗，即日晏晝打針。
之前嗰兩針都係打手臂，我其實冇覺得隻手好痛好辛苦，反而仲覺得有少少舒服，成日會無啦啦用手臂嗰個位挨住埲牆，幾舒服下 (我係咪變態？🤔)。今次打第三針因為驚有心肌炎，所以選擇打大髀。打針嗰陣我覺得冇乜嘢，反而仲冇打手臂咁痛，打完第一日都冇咩事。但係去到第二日就嚟喇，左手手臂痛可以用右手，左邊大髀痛唔通單腳行？我個大髀勁痛，仲痛苦過打手臂，但係冇辦法繼續要行路。打手臂之後痛嗰個範圍好細，打大髀之後行路係成個大髀都痛。不過而家差唔多去到第三日就已經冇咩事，正常返晒。
呢個只係我嘅經歷，冇咩特別意思想表達。你哋可以喺下面盡情留 閱、seen、ok、？、哦、咁又如何、打第三針又點、打針個位痛係正常唔明講嚟做乜嘢、唔係得你一個人打過針 等等嘅留言。
利申: 唔係防疫過度緊張人士 (避免唔過審批)