#NSS家庭
[Guest] 我阿哥真係好煩。
*長文*
小妹中二，今年14歲，有個今年22歲嘅阿哥。我哋自細就冇乜溝通，因為年齡差距比較大，而且興趣同價值觀好唔同，所以根本冇嘢傾。細個嗰陣佢都仲會喺阿爸阿媽唔喺屋企嘅時候睇住我，不過我去到中學已經可以自己一個留喺屋企 (未夠16歲，但係有邊個16歲之前冇試過自己一個喺屋企呀)，於是我哋幾乎零溝通，就算係溝通都係嗌交
冇錯，我阿哥嘅性格係乜都可以嗌一餐嗰隻。我屋企張飯枱喺廚房隔離，飯枱其中一個位係喺廚房入邊，個廚房好細，如果有人坐喺嗰個位就一定要互相遷就先可以入到去廚房，咁有一次我阿哥就坐喺嗰度食早餐啦，我想入去廚房斟杯水，就同佢講唔該借借，佢竟然話：「借咩啊，見唔到我食緊早餐咩，係唔係唔識行呀？乜啲讀書人都咁on9㗎」，其實我都係想入去斟杯水啫，而且都有講「唔該」借借，使唔使咁惡呀
唔止呢一次，每次同佢講少少野，佢就會好惡咁回應，其實我平時好少同人嗌交，不過佢咁鬼惡，我次次都撳唔住團火，於是就會嗌交。你以為佢係大蝦細？錯喇，佢成日都同阿爸嗌交，佢呢兩年讀緊副學士 (因為轉咗科所以比較遲先開始讀副學士)，又有返工，成日都唔返嚟屋企瞓，就算返嚟瞓，多數都唔會喺度食飯，就淨係返嚟沖涼同瞓覺，不過佢一喺度食飯，就一定有交嗌，阿爸鍾意電視撈飯，食飯嘅時候會開新聞嚟睇，咁多數佢都會講吓入邊啲人點點點，跟住阿哥就會反駁佢，又唔俾阿爸發表佢嘅意見，阿爸身為長輩就梗係唔會讓步啦，搞到佢返嚟食飯就一定係嗌交嗌足成餐飯，大佬我想正正常常食餐飯啫，你就次次都撩交嗌
我頭先都有講過佢而家有返工，我估計佢收入都唔錯，始終唔使比住宿費，佢賺到錢之後，就成日話阿媽煮啲餸cheap, 你咁威你煮啦，成日嫌三嫌四。阿媽琴日買咗隻靚雞返嚟煮，阿哥又返嚟食飯，佢就話：「下次唔好煮雞啦，煮牛扒。」等陣阿媽煮完牛扒佢又會嫌三嫌四，真係好鬼煩。見佢咁冇禮貌，阿爸就話佢啦，跟住佢又唔聽人講嘢，其實你都唔使俾家用啦，仲有間屋俾你住，仲嫌棄咁多，係咪想* (請大家自行想像嗰粒我想講嘅字)
佢仲成日話我讀咁多書，第時做書蟲，真係火滾。你讀書唔好，搵嘅錢亦都唔係靠你嘅學歷，但係唔好踩我哋呢班努力讀書嘅人啦，知唔知有幾多人為咗dse日讀夜讀，我哋嘅夢想，唔好亂咁摧毁！
我對佢真係有太多不滿，一篇文講唔晒，不過佢咁揮霍，佢對阿爸阿媽嘅態度又咁差，第時佢冇晒錢問我借，我實唔借比佢，唔好話我絕情，邊個叫你咁衰啫。有錢真係唔係大晒㗎！(而且你又唔係真係好有錢)
真係太不滿，可能有啲語無倫次，請大家體諒
sorry for 1999
唔該admin!!!