#NSS愛情
[KYC] 長文慎入
俾人hurt過一次 我發覺自己唔再敢鍾意人
喺中四上網課嘅時候，我識咗一個女仔，佢喺一個好好嘅女仔。雖然我哋喺同一班，但係我哋唔太識對方，直到BIO堂一齊做功課，我哋熟落咗，變成一齊傾住電話做功課、溫書，一齊傾到凌晨，分享自己鍾意咩type 有咩目標etc 我哋互相都有好似嘅價值觀 思想上比較接近。另外，喺嗰段時間，我哋嘅成績好咗好多，考試入面一齊由中游上到前段，成功感真係好大。
之後，我哋都有keep住傾電話、曖昧，一切如常。喺復課之後，我同咗佢表白，而最可笑嘅事發生咗，我最好嘅朋友喺第二日同咗佢一齊。我好似一直俾人隱瞞咗，好似一個傻仔。自此，我哋冇再傾過計，而好似三個人都有共識唔提呢件事，所以呢件事成為咗我哋嘅秘密。
自此之後，我對愛情冇咗信心，亦都話俾自己聽，要將一切做到最好，唔可以衰俾佢哋睇。
過咗一年，我同一個同級嘅女仔多咗交流，佢成績好好、性格好nice、好鍾意笑，有小小怕羞，即係鄰家女孩feel咁，亦都係我鍾意嘅類型。我哋會一齊傾偈、約出嚟玩、互flirt。相處咗一段時間，佢有明示暗示，所以我知道佢鍾意我，但係我唔知點解自己鍾意唔到佢，只係有好感。同時，我知道好多人鍾意佢，因為之前嘅失敗，我冇信心可以好好愛佢，成日覺得有人比我更貼心、更愛錫佢，所以我決定放手，我覆少咗佢嘅信息，慢慢淡出佢嘅生活，因為我知道佢好多選擇，揀一個真正鍾意佢嘅人絕對俾我更好。
就係咁，我放棄咗。睇到呢到，或者好多人會覺得我好浪費，有咁好嘅女仔唔珍惜，其實我都知，但係自己仲未有能力面對一次挫敗，even失敗機率近乎0，我都唔敢冒險，我就係咁懦弱，對唔住。
喺暑假嘅時候，有個唔太熟嘅女仔（其他學校）成日覆我story，傾傾下先發現大家都有一樣嘅目標，想入一樣嘅科。自此，我哋多咗傾計，由一開始交換下升學情報，到傾下喜好、理想型etc 有日，佢約我睇戲，同佢一齊行街、睇戲，令我又重新有返心動嘅感覺，覺得同佢相處好舒服。之後，我哋又一齊睇咗月老，送佢返去嘅時候，我哋有意無意咁拍到好埋，但係我都係拖唔落手，我唔敢表白even我知道我鍾意佢。 我硬係覺得自己唔夠好，佢係band1名校；我只係普通學校。佢家境比較好；而我只係公屋仔。我好自卑、我好懦弱、我好驚失敗、好驚佢睇唔上我。因為失敗嘅畫面成日係我腦海浮現。所以，潛意識叫我唔好去馬。
我又失去咗一個企起身嘅機會。 之後，我努力麻醉自己，逼自己要keep住做到最好，好想證明俾人睇，我好有能力、好有決心、要令人另眼相看。但即使後來有女仔同我表白、approach我，我都選擇冷處理、婉拒，因為我感受唔到一個可以令我打開心扉，盡訴心中苦楚嘅女仔。
我好辛苦，表面上人人都話我好勁、好叻，好似多人鍾意咁，而我早嗰個已經殘破不堪嘅內心一直冇人了解，而嗰個傷口亦永遠唔肯結疤。原諒我忍咗太耐，實在忍唔住，只可以好卑微咁喺度分享。