#NSS愛情
[GUEST] 同個女仔識左幾年，一開始都只係朋友嘅朋友，之後一班人出嚟玩先真係識對方。過多一排開始熟，傾計都多左，有時都傾得好deep，試過幾次傾通宵。之後出嚟玩同佢都玩到好癲，亦由果陣時對佢有feel。身邊啲朋友亦察覺到我對佢好似有啲嘢，咁好快都傳到去個女仔到。個女仔私底下問我係咪鍾意佢，我一開始都冇唔知點答佢，只係叫佢唔好亂諗。過多一排我始終覺得唔講出嚟好唔舒服，諗左好耐先認，我認左之後佢都話對我有feel。跟住段日子我哋只可以係電話度做返自己，係其他人面前都盡量扮冇嘢。咁一直相處都唔錯，但因為我同佢始終未算成熟，而且大家都差幾年，又怕身邊人會有閒言閒語，所以一直都冇開始。過左一段時間，佢好似有心避我，成日都hea覆甚至已讀我，咁我一開始都冇當一回事，但情況都維持左一排，咁我唯有少啲搵佢，每次都係簡單幾句，但漸漸對話由少少變到完全係零，我一直將對話置頂，一直等佢搵我，但冇諗過最終差唔多兩年冇搵過對方。
直至上年尾一班朋友一齊出嚟玩之後先有返對話，但我感覺到大家同以前已經唔一樣，變成最熟識嘅陌生人。我曾經諗過忘記佢，畢竟我哋都冇真正開始，但始終我哋係有鍾意過對方。過多幾年係點冇人知，但我希望我會等到你，我亦唔會後悔一直等你。