#NSS個人
[GUEST] 我是一名有躁鬱前兆的中度抑鬱症
我都無想像過中二，13歲就會患中度。其實我一直都好怕自己會變成躁鬱，深知躁鬱唔好醫。一開始確診入左兩次醫院，我一直覺得醫院先可以比我休息，幾日就出來依舊無好轉。同爸爸媽媽講，佢哋第一件事就係好大聲同我講：知唔知你入醫院，最辛苦個個係我地？我地咁俾心機保你出黎唔比你入精神科醫院，你而家同我講想入？你係咪想你媽辛苦到死先安樂？放過我啦囡，你遲早都會好翻架啦，抑鬱可以抑鬱幾耐。
12月醫院出返黎，好似一切都無發生咁繼續嘻嘻哈哈同朋友，家人過聖誕。個時，我連自己都唔知我係扮緊開心。辛苦的時候完全喊唔出，真係好辛苦。新年開始覺得面對各種親戚好疲憊，唔想面對佢地，但唔想被爸爸媽媽發現我又復發，所以好多次都係硬上，假笑。我以為我出院的時候已經好返好多，由之前辛苦到追星都無力氣，到而家，認為追星係我唯一的救贖。其實唔係變左好多，最多咪聽佢地的歌終於可以喊得出。但我覺得作為佢地既粉絲，係一個抑鬱症想自殺既病人，我覺得好丟臉，又係一種壓力。
直至網課，我困自己係間房度上堂，有時要開鏡頭就扮開開心心咁，一關鏡頭我就喊 一直喊。我淚點比以前更低了。想抒發情緒，但夏天又唔可以介手，爸爸媽媽係屋企無得放聲喊，大叫。必理痛無得賣，醫院開的抗抑鬱藥食得多會卡曬係喉嚨，又無任何反應，所以根本無地方發洩。加上而家入醫院又唔太好。其實見到媽媽因為委屈可以喊得咁大聲，爸爸又會寵住佢，我好羨慕佢。
成日見到某些famj扮抑鬱，記得個時佢同我一個同樣都係抑鬱症既朋友講：我都想抑鬱。點先可以好似你地咁入醫院？ 我聽到第一秒係想爆粗。如果你真係試過抑鬱症你唔會覺得型，你會想死多過周圍曬自己有抑鬱症。
而家全部野都係網上進行，同社工，同老師講都無用。根本無可能有實體行動。加上因為我之前自殺傾向比較嚴重，醫生唔允許我自己留係屋企，一定要屋企人係屋企陪著我。我一直都好鬱悶。幾個鐘解唔到幾條題，個腦好混亂，集中唔到。跟住就會唔出聲咁喊，係咁用力咬自己，撕算草紙，唔想比父母知我又發作。其實我覺得自己好失敗。我開始有幻覺。明明個個都戴口罩，但我一見到人，佢地好似個個都恥笑緊我咁。係好恐怖個種咧嘴笑。我真係好驚，好無力。我應該點算好？
Sor for1999