#NSS家庭
[GUEST =]] 其實我老母算唔算管得太嚴？
見到 nss secret 有唔少父母管得好嚴嘅情況，雖然佢哋都只係為我哋著想，但係難免會覺得有少少過份。係呢個平台都希望搵到解決方法。先講一講背景，小妹今年 f2 ，我老母由小五就開始管呢樣管個樣，仲要越嚟越嚴重。
（一）係屋企裝 cam，仲要唔止一個。一開始我諗可能係一個保障，又或者只係嚇下你啫，但之後我先發覺原来佢無時無刻都 check 住。事源喺某一個朝早 6 點，咁我就起咗身，但係就攤咗係張床度睇咗一陣電話，無啦啦我老母跑咗出嚟𥄫我，事後更若無其事咁提出呢件事，內容就話我一早起身淨係識睇電話。
（二）電話限制就基本啦，又無數據。有人就話失聯咁點算？呢個問題根本就唔會發生喺我身上，因為都冇得出街。甚至係屋企樓下，返到屋企都要報備。就算用幾多條件去交換，都唔可以。係呢個前題下，同朋友出街，都只係一件奢侈嘅事。其實我都只係想喺中學生涯留下一點回憶啫 !!
（三）而唯一可以放鬆嘅就只有沖涼。難得可以休息一下，有自己嘅空間。但係明明只係沖咗 30 mins 都冇，就開始俾人催（利申屋企有兩個廁所），又話人發白日夢。另外，我更加發覺佢好鍾意踩低人，再抬高自己，講到自己有幾咁聰明。又唔見佢入到牛津劍橋？做政府呀笨 !!
解決方法：
– 離家出走？根本就冇可能，因為我連少少錢都無，零用錢 $0
– 同父母傾下？我老母係一個極度固執嘅人，仲有句名言「生得你出就有權管理」，咁佢又唔係冇道理，所以最後都放棄咗。
去到呢度都總結一下，基本上佢嘅管制包羅萬有，簡單啲嚟講即係全部。我當然希望搵到解決現狀嘅方法，不過睇嚟都無可能架啦。出呢篇文，可能只係發洩，或者希望各位家長比返少少空間俾我哋。其實自問成績唔算太差，起碼唔至於要管到咁。係咁嘅環境下生活，有時我真係覺得坐監嘅生活仲好過我，有得放風 ~ 我而家連街都冇得出呀。但係香港有《少年犯條例》 如果有家長睇到呢篇文，都希望可以考慮下子女嘅觀點。明白到家長有自己嘅出發點，但係做人凡事留一線。做得太絕，結果可能一發不可收拾。呢種管制方法就好似有幾十對眼 24 hrs 望住我，嗰種壓迫感又有幾多人明？
最後都好多謝我嘅朋友，成日聽我訴苦。以上為真人真事，絕無誇大。如有不滿，請以文明嘅態度發表意見。