#NSS個人
[GUEST] 小妺今年中三，我由細到大都比較大汗，而我全家都係比較大汗嘅。我隻手、腳同胳肋底都成日出汗，就算開着冷氣都會。
以前我有打羽毛球，但係次次啲頭髮同背脊都濕晒，汗水會喺條辮嘅髮尾係咁滴落地下，搞到好尷尬。
到咗十一二歲胳肋底就開始出汗(相信好多人都係)，一開頭都只係少少汗，冇乜問題，但我啲汗越嚟越嚴重，成日滲透件衫。我著校服嘅時候就算幾熱都要著住件冷衫嚟遮住啲汗，如果唔係就會好尷尬，體育堂就更加辛苦，做完運動又熱，又要着住件外套，搞到越出越多汗。考試嘅時候我隻手都會不停出汗，寫文嘅時候好唔順手。
我有試過用止汗劑，但係我一路搽一路出汗，就算搽咗上去都好快甩晒。我亦都有試過著多件底衫嚟吸汗，但係啲汗都係會滲透件底衫。
而家就嚟夏天，我隻腳就算冇着鞋都會出汗，瞓喺張床嘅時候如果腳板掂住張床，床單就會濕咗。
我好鍾意買衫，但係我鍾意嘅款多數都係比較貼身嘅，但係夏天咁熱流咁多汗又冇得著，搞到有啲唔開心😢。
我有上網查過，手腳同胳肋底特別多汗有可能係多汗症，但又可能只係青春期比較多汗。大家覺得我係咪應該等到青春期完咗之後再睇吓情況點先睇醫生？呢個問題困擾左我好耐，如果大家有差唔多經歷嘅話唔該話俾我知有咩解決方法🙏🏻，我都想著靚衫啊！！🥲