#NSS個人
[GUEST] 又係長文
我尋日投稿過，但我再嚟，因為我真係好辛苦。朋友又冇聯絡，屋企人關係又唔好。
我原本喺學校有幾個朋友，但大家都喺學校先傾偈，返到屋企wtsapp只係問功課，從來唔會開視像電話，之前疫情唔嚴重都冇試過約出街玩，食餐飯都冇。我知佢哋唔似係嗰種成日要約埋一齊嘅人，但都懷疑佢哋係咪真心。見住阿妹日日早午晚同同學視像傾得好開心，傾得耐到個同學阿媽都開始不滿咁滯，我覺得相比下自己好差，自己做唔到朋友心目中嘅第一。我諗過係咪自己外表(頭偏大，成57cm，女同學150-153，偏瘦嘅居多，我157，少少肥)，但有個樣唔靚，高又肥嘅都有朋友，得我停課期間係咁孤單，我成個怪人咁。
我有打機(Sakura School、School Girls Simulator之類)，有用假名開幾個IG帳戶去post啲靚嘅遊戲相，識到其他東南亞玩家，大家都係中小學生，我唯一嘅自信心來源就係呢度。喺嗰度我1000 followers，成日收到DM/comment，但喺現實完全冇，令我感覺有啲空虛。我唔係沉迷個遊戲本身，我係沉迷呢種自己有朋友嘅錯覺。
屋企方面，其實我係之前「小六阿妹日日嘈住要裝修」嗰篇嘅樓主，其實我只係F2，阿爸都唔係失業，我唔想被認出先改少少內容。我地基本開支有餘，但妹又係咁講要裝修，我更覺得屋企窮。裝修都搞唔掂，阿爸係經濟支柱，月薪7萬以上，但阿媽唔返工，加上供樓水電媒管理費，變相好難儲錢。今日收到管理費單，$1200，我見到時嗰種感覺彷彿自己考試卷得12/100，覺得屋企咁又冇晒錢，我目前又無能為力。
唔單止係咁，我明明開始溫書做功課，但阿媽日日都同我講：「你呢代後生仔日日zoom，書又讀唔好，正一未來廢物！」轉個頭，有手有腳嘅阿妹叫阿媽幫佢攞放咗喺3米內嘅手機，阿媽幫佢攞，我真係好嬲。點可以咁偏心？停課我地揀㗎？唔溫書又係廢，溫書又係讀唔好。呢句係對一個世代嘅歧視！老母，你肥過人，腦容量又真係少過人㗎喎！
好大壓力，01:30先瞓到，第朝08:30先起到身，遲過以前放假，老母又話我遲，但我睡眠質素真係差！唔係同床嘅阿妹嘈，佢瞓得好安穩。我今朝心情感覺還好，今日晏晝因一啲事鬧交後跌到落谷底，阿爸話我情緒大起大跌，EQ好差，我覺得係，但你有冇諗過係你呢對廢老導致嘅？唔係冇錢，而係冇朋友傾訴，冇鍾意嘅人，亦都冇人要我。我只想呻下，我只想有啲日日都keep住聯絡嘅朋友，亦都想呢段時間過去，唔只係疫情，仲有我嘅壞心情。多謝大家睇到呢度。