GUEST

#NSS個人

[GUEST] 我覺得自己好自私

（利申03男）
最近發生咗好多事，我希望以下內容保持到條理啦…
咁講起啦，我喺單親家庭長大。老豆又要搵食，所以我細個成日自己一個。就算佢放工或放假佢都好攰，加上我雖然知佢錫我，但佢脾氣甚至情緒有啲問題，亦冇乜朋友，我同佢稍有意見不合都好易惹火上身，久而久之我對佢都係避得就避。細個家境真係差，電腦手機通通冇，唯有自己同自己玩大富翁。佢好着緊我，但偏偏我有過度活躍，小學經常搞出麻煩事要佢請假見家長，所以佢眼中我係個問題兒童，佢會對我好強硬，我有唔同意見就會認為我駁嘴唔聽話，會打我，攞拖把嗰隻。我自細就覺得佢打橫嚟，控制欲好強，所以我好唔鍾意喺屋企，我覺得喺屋企我好似坐緊監咁，只係有地方瞓有免費嘢食同埋要受氣，甚至產生咗“唔係睇在你俾咁多錢養我嘅份上我一定走”嘅諗法。我唔知係咪因為咁嘅緣故，我對屋企同埋老豆好有疏離感，我甚至就算理性上知道佢一定係緊張我先會咁，但我依然覺得我嘅世界只有自己一個人，至少，入面冇我嘅親人。
可能有人會問學校嗰邊點，我不得不說我有好好嘅朋友，佢哋幾個係我值得交心嘅，不過都係中三之後嘅事了。中三之前，小學如上所述成日搞出事，所以老師都唔鍾意我，奈何佢哋緊張名聲，所以全部事低調處理就算，然後堂上就間唔時玩下針對咁。好似惡性循環咁，平時越係唔開心，玩起嚟就越癲越容易過火，搞下搞下身邊只係得返玩得差唔多癲嘅“朋友”，其他人都驚左我。升中嗰陣，依家諗返好好彩啦，得幾丁友同小同中，仲要本身唔熟。中學好好，老師知我係sen，有好好支援我我先仲生存緊。所以中學對我嚟講，反而先係最接近“家”嘅存在，反觀“屋企”就只係“屋企”。
只係到我識到交心朋友開始，我先驚覺自己係有幾咁自私。
我對朋友好，喺我嘅自我反省中，更接近一種“放人情債”嘅行為，因為知道佢會對返自己好所以我先對佢好。我亦會喺心入面劃分好多好多層，然後去因應朋友嘅“價值”最後決定擺佢哋喺咩位置，同埋點對佢哋。
我覺得自己好假，但理性又不斷催眠我，係因為老豆對我唔好所以我先會咁，我只係想保護自己。我好唔鍾意咁樣嘅自己，討厭咁自私嘅自己，但我每次再同人接觸，從眼神有接觸嘅一刻，我已經感覺到自己又開始計算緊人。
疫情關係啦加上我搬屋搬離咗原先嗰區，搞到我除左同交心朋友之外都冇再接觸其他人咁濟。最近有過本身ok friend嘅朋友仔wts搵我，問我近況。我第一個反應居然係“做咩突然搵我有咩企圖”。我反應過嚟之後呆左，我對自己好失望，明明佢係個好nice嘅人，我同佢亦唔係真係唔熟，但我關心自己嘅利益有冇被盯上多於呢位朋友，我覺得自己好自私……
雖然我依家入到大學算係有啲social，但我卻無法將大學同學視作“無關利益事嘅朋友”……加上18歲之後老豆開始同我講屋企嘅實際情況，例如收入支出，身家總共有幾多，學費又要點畀等等，我對於屋企，對於老豆，彷彿慢慢得返錢銀上嘅利益關係，卻比細個更加疏離。明明老豆咁努力去俾最好嘅我，佢咁錫我，我卻只係咁樣諗到……我好擔心自己繼續咁樣落去，人際同各方面會出大事，好驚自己嘅自私會被揭穿，好驚自己會成為一個冇人性嘅人……但我偏偏控制唔到自己唔去計算人，但咁樣又真係好唔應該……我到底應該點做？我可以點樣去控制呢個病態？希望呢度有人可以救救我……