#NSS個人
[GUEST] Admin po ig thx
大家好 我上嚟純粹係想發洩下關於鬥地主呢個遊戲同share我太公嘅故事
我完全唔明點解鬥地主呢啲咁悲慘嘅事件都可以成為一種小學生都玩嘅遊戲，每次喺學校見到有人玩，我都會變得情緒化，唔明點解可以笑住咁講鬥地主呢三隻字。
我太公(阿爺個老豆)之前喺新中國成立嘅時候係一個地主，無可避免地被人批鬥。太公係一個好人，佢有一個稱不上係奴隸嘅農奴，佢有比飯呢個農奴食，對佢好好，仲喺人哋18歲嘅時候揾咗個老婆比佢同比咗撻地佢。當所有地主都被農奴批鬥嘅時候，太公嘅呢個農奴因為有好好嘅待遇所以冇批鬥太公。但係共產黨就派咗隔離村啲人去批鬥我太公，令太公日日都被啲共產黨嘅「打手」打。全家人都被人監視，好彩因為太公對條村啲人好好，有啲鄰居都會偷偷哋比嘢食我阿爺同佢啲兄弟姊妹。之後太公就吊頸自殺咗，係我嗰陣得9歲嘅阿爺親手放返太公落嚟。冇幾奈，我阿爺就走難落嚟香港。我姑婆(阿爺個家姐)宜家90幾歲，瞓覺嘅時候都會夢到啲「打手」捉佢同太公嚟打，有時瞓瞓吓會尖叫。明明已經過咗成80年，呢個惡夢仍然跟隨住佢哋，真係令我好痛心。
多謝大家睇到呢度。