#NSS個人
[guest]
你好，小女今年讀中五，但可能表達能力不太好，下文可能會1999，非常抱歉。
我有一個積累以久既情緒問題。我自中二起就經常處於壓力爆煲既狀態，不定期就會想喊。我認為係源自於多方面如社交、父母同自己帶比我既挫敗感而令到我非常自卑，所以壓力經常好高啦。我既真心朋友屬於非常少數，多半都係hi bye friend同埋問我功課既片面朋友，所以未必搵到我信任既同輩傾訴我既問題(亦都可能我驚打擾到佢地掛)。我因為講自己壓力既野講到一半就會想喊，一直而來都無法將我真正想講既野同感受表達比其他人，包括我父母，所以冇正常方法去講比其他人，令到其他人難喲理解我既想法。我唔太理解咩時候同其他人講我既心事比較好，亦都唔知點講我到底壓力係邊好，所以最後都係冇同人講到。我好驚佢地唔想聽我廢up、驚佢地覺得我做作，所以唔敢同人講。
我比較肯定既一部分壓力來源係來自於自己。我比較差既科目有physics同中文，佢地會比好多挫敗感比我。除咗每次收到成績都係唔合格之外，當我溫書既時候最後都會喊出嚟。例如一條長答mechan既題目，我可能要用大概30分鐘先解到出嚟，但比其他人做就5分鐘都唔洗。做題目會做到覺得自己好失敗，會因為做極都做唔到覺得好崩潰。我覺得計唔到數，背咗書都唔識答問題果種感覺好難受、好挫敗，但對我父母嚟講我唔及格就係我冇比心機讀書，但係我覺得我真係好努力，依然冇人睇到我有努力過咁。
第二就可能係社交問題。我係學校冇咩真係好好既friend,有既最多都係會問我功課，食飯之類既同學。任何時段如果我唔主動搵人傾計，係冇人會嚟搵我。我理解我共同話題不多，所以咁樣算正常。但係當我見到同一班同學係ig日日曬佢地點一齊癲，傾計既相既時候，我心裡難免會感覺好難受：我係大部分時候都有讓佢地，例如比佢地餐廳坐卡位、幫佢地膽遮、讓佢地排隊先etc. ，但係學校外佢地既玩得好開心，但永遠唔會有我份。我每一個周末就得我一個係屋企畫醜圖渡過，對比起嚟我會覺得好難受，亦都覺得被忽略。
其實仲有好多網路上既唔快樂經驗令到我係好多時候都好低落，因為我係現實同網上要搵快樂係好困難既一件事。我搵唔到發洩既渠道就會夜晚一個人係間房度喊，但我好憎要咁樣喊：唔可以喊出聲之餘，要控制滲鼻涕既聲音、注意有冇嘈到人、要大力呼吸。最後都會喊到眼腫(正常現象)，心口好痛，第二日會胃痛，有啲虛脫既感覺。但我唔覺得發洩落人哋身上係唔太好既事，但壓力又一直處於高處狀態，過幾日又會「爆發」幾晚，越喊越痛，成為咗一個惡性循環。
我都知道再咁樣落去係唔得，想盡快處理好心理上既大量問題，準備好心態去溫書準備dse，但係我完全唔知邊度開始求助好，又冇錢，又唔知點同父母講好，都唔知道點算好。請問我應該由邊度開始做起好？
如果表達得唔好，深感抱歉。
admin pls po ig, 感激不盡!