#NSS家庭
[KMYLS] 小妹今年六年班，想同大家分享啲嘢。
我係離異家庭，一出世個時就比我奶奶嫌棄，因為我係女仔，女仔無用，要男仔，就叫我老豆再生多個。
因為我細個嗰時屋企收入低，月租淨係交得起房租同每日四個杯面錢（差唔多），無錢買奶粉，我就淨係飲洗米水大。
因為老母返工原因，細個就係老豆身邊，不過我老豆淨係識換屎片同幫我沖涼，所以我兩歲之前學唔到任何嘢，佢唔會帶我出街，唔會教我識字，唔會教我常識，我喊嘅話淨係塞個奶嘴就算。
兩歲嗰時，老豆話出去翻工，話要去內地返兩年，老母話得，佢胎住我啊妹返工，跟著我就每日係屋企訓，肚餓口渴見都咩食得嘅就食，飲水龍頭水。
兩年後，老豆返黎，話比人炒左，淨係有七萬，所以話係屋企湊我，老母去返工。
然之後四歲，我去返學，一開始係老母湊我去搭校車跟著去賣衫，跟著老豆湊我返黎。但唔係囉，佢係放養我囉，唔理我，叫我自己搭校車自己行返屋企。每日帶佢個條女返黎，啊妹都出左世，就有奶粉飲。我都係放學肚餓見到咩就食咩，幼稚園個時我淨係食過幾次正餐，功課都唔知要做，都係老師教我先知。仲要當住我個面食煙，勁臭。
有時老母返黎，因為壓力就會攞我出氣，打到我全部紫色。
後尾暑假，我係屋企訓到自然醒，老豆就唔教我英文數學個啲，由於老豆老母都打機，老豆就教我打電腦game，教我點樣開機，點樣操作角色，點樣放技能，雖然隻game啲字大部分都唔識，不過都係有學到少少嘢。個陣玩開劍靈，龍之谷，黑色沙漠同天堂2。
不過啲game都有啲有限制級，所以學到啲唔應該學嘅嘢。（（
同埋個時acg同vocaloid都幾紅，我老豆會睇，我就會跟著睇，嗰時覺得羅密歐同公主殿下個個mmd好好睇，都有去睇黑岩射手。
令我覺得虛擬世界比現實更好，所以就沈迷左。
之後五歲，老母發現老豆有外遇，就提離婚，老豆話幫老母返工，之後再離。
老母係屋企教左我好多嘢，好似補習咁樣，不過因為我老母唔識英文，所以我嘅英文都好差。
小一，佢地就分居，我老母又去返工，我係學校唔適應環境，同同學無話題，佢地係天線低低B同米奇老鼠，我係acg，所以我係學校基本係無乜講野。
之後有個男仔，睇我唔講野，就蝦我。例如我跌筆，我彎身去執，佢就撳住我後背，唔比我起身，又或者係我手冊畫畫，之後再撕爛，將我啲文具dum係垃圾桶，叫我自己執，再冤枉我鬧粗口。
我唔知點做，個老師就以為我不乖，所以罰我企。之後比老師發現，先只教番我唔可以唔出聲，都額外關心我，之後搵左社工。
其實個老師好好人，不過個社工好L煩，煩我成個小學。
有次，老母發現我成日咳，就帶我去睇醫生，先至發現我患上肺部慢性疾病，要食藥，搞到我地屋企無錢。
二年班，老母教我煮飯，我淨係識煎下雞蛋個啲，之後會去網上睇食譜煮飯。跟著就搬屋去左屯門。
三年班，我參加左校隊啦啦隊，體操我一年班就有學，但隨住越黎越多唔同嘅人參加，因為我跳舞唔好，係因為我做到好多比較難嘅動作，例如側手翻個啲，個老師先邀請我。
我係啦啦隊成日比前輩用唔同嘅眼神望著我，嫌棄我唔識跳舞，嫌棄我做嘢慢人一拍。
所以我都係比人蝦，例如係表演個時搶我啦啦球，特登整跌我，同我講啲好難聽嘅說話。
四年班老豆話離婚，同老母搞左好多手續，正式離婚。
五年班，因為一句「點解你呢種垃圾都可以黎校隊」所以我就無去啦啦隊了，老母仲打我，鬧我點解唔去，點解唔繼續跳。
但係我淨係鍾意畫畫，跳舞已經唔想去，之後我體操都取消左。
我專心練習畫畫，一路聽歌一路練習人體。
雖然係網絡識左好多frd，係學校都幾開朗，幾吵下，不過同同學唔係好熟，真係frd嘅得幾個（因為佢地睇acg），現實都無幾多frd。
老母都搵左其他工，走去返地盤，搵到佢嘅男朋友，每日翻黎就淨係同佢個男朋友傾計，唔理人。
到左六年班，我地班嘅發言更大尺寸，會講粗口，講鹹濕嘢，所以同同學frd好多。
因為而家暑假，我每日宅係屋企唔出門，畫18禁本，因為老母有男朋友嘅關係，同我嘅關係更加差，因為佢個男朋友鍾意食榴蓮同辣嘢，所以就請人地返黎食榴蓮同辣嘢，但我個人係食唔到嘅，所以我係被逼食囉。
咁就算囉，睇fb先記得起我生日，請佢個男朋友黎幫我慶祝，買兩個蛋糕，一個榴蓮味，一個芒果芝士味，好嘢，一個自己鍾意食，一個男朋友鍾意食，我全部都食唔到，前排發現身份證未換，叫佢幫我換，又話「五百蚊好貴啊，你自己換啦」
我話唔換犯法，要罰五千
「你罰咋嘛又唔係我，關我咩事」
我老豆就偏心我啊妹，覺得我啊妹得意啲，每次出去見佢一定係我係後面好似跟蹤狂咁跟噶，雖然老母都係。
所以我真係好憎我老豆老母，忘記我生日都算，仲要唔教我嘢，唔負責任，好似我唔係親生咁個樣。
我完全接受到人地話我唔孝順，因為呢個係真。