#NSS愛情
[Guest] 六年中學生涯平平淡淡就過咗去，接踵而來嘅四年u life都喺兼職同功課嘅伴隨下匆匆完結。冇諗到輾轉間又返到中學校園，遇到你。
初到埗嘅小薯最怕環境中有大風浪要處理，偏偏我經常要同你呢個特別嘅學生相處。你出格嘅行為令我好頭痛，但係都反而令我想好好理解你行為背後嘅意思。多次被逼嘅相處後，漸漸我變得冇咁拘謹，有時你同我講學校文化，有時我幫你同老師反映難開口嘅意見，有時我哋一齊觀賞表演，有時我哋一齊過學校節日活動。
可能就係因為你性格直率，你唔會比社會規範限制，不過即使你已經成年，我始終覺得我地身份有別，我有責任保護你，我地只可以低調開始，我唔想你因為我而有咩影響。有時我地遇到啲開心嘅事，我唔可以同人分享，不過唔緊要，我地兩個開心都夠。
我有時會質疑自己，其實喺到擔心啲咩、緊張啲咩。係身份？我哋又唔係師生關係，唔存在利益衝突，我亦都唔會將敏感資料講出去。係年齡？我哋之間年齡差距又唔係太大，放喺學校以外嘅情侶身上嚟講都算常見，而且我哋相處上都冇因為年齡而遇到咩問題。我一直都有種奇怪嘅信念，就係只要過多幾個月，當你畢咗業，我哋就自由啦，但係我冇諗過我哋嘅關係原來會突然不了了之⋯⋯
就如開心事唔可以同人分享，呢樣唔開心事更加唔可以同人傾訴，有苦自己知。我每日面對住充滿你身影嘅環境，等待一個機會，一個再見到你嘅機會，然後故作泰然咁互相揶揄，希望可以得到一個答案⋯⋯