#NSS個人
[Guest] “有啲人總係喺失去之後先學識珍惜，唔好再努力討好人” ，你記唔記得呢句說話呢。
純分享，抒發自己嘅感受同經歷，不喜勿插。
雖然其實冇權干涉大家嘅事，但希望大家見到我呢篇文嘅時候都可以唔再做一啲令自己後悔嘅事。見到篇文認到我係邊個嘅人唔使相認了。
珍惜眼前人個個都咁樣講，又有幾個個真係做到？
我曾經遇到一個好愛嘅人，亦都係我嘅初戀，記得嗰時佢對我都有意思，佢會主動搵我講嘢，雖然係愛佢，但係細個對愛情冇乜想法，所以一直都冇祈求過成為佢身邊嘅人。當時啱啱畢業，我哋啱啱交換聯絡方法。嗰陣時細個屋企人監管都有啲嚴格，佢有時whatsapp我都係whatsapp我屋企人嘅電話號碼，因為我未有屬於自己嘅電話。屋企人嗰時唔想我花太多時間去社交，想我專注返學業，於是嗰個人搵我嘅時候我屋企人都幫我已讀咗佢，甚至用一啲好冷漠嘅語句覆佢，因為屋企人冇同我講，我就連佢搵我我都唔知，係過一段日子我再睇返屋企人嘅手機先發現到。但係嗰時已經好耐，我都唔知覆唔覆。漸漸地佢冇再搵過我，亦都各散東西，成為兩條嘅平行線。到後尾我終於有自己嘅自由可以有自己嘅社交有自己嘅電話，我搵返佢佢已經對我好冷漠，亦都係story到講“有啲人喺失去之後先識珍惜，唔好再討好別人啦”。我嗰時一直好想搵佢解釋，其實我好鍾意佢，我唔想失去佢，但係我冇資格，佢已經唔想再理我，可能已經唔記得咗我，unfollow咗我，我好後悔亦都好唔甘心，近排相遇，已經徹底變咗陌生人。但係其實我有更多更好處理嘅方法，例如當時真係夠愛佢可以偷偷地用父母嘅手機同佢講嘢，如果我當時夠珍惜佢我就唔會佢send咗message比我屋企人咁耐我都唔知。就係咁樣，我失去咗一個好愛嘅人，佢可能已經忘記咗我，我只係可以默默關心佢。就係咁樣，佢成為我嘅初戀，亦都係一個人生最痛心最遺憾嘅經歷，到依家都未能完全淡忘。可能係因為初戀一定有一個特別嘅地位，同埋因為自己嘅內疚同埋遺憾掛。雖然你好似冇follow呢度，但係你有緣見到嘅話衷心同你講一句sorry。
第二個經歷係我升上中學之後遇到嘅一個人，我哋曾經係好朋友，佢都曾經同我表白，但係未中意佢嘅我 拒絕佢。後尾我亦漸漸留意佢鍾意咗佢。無奈有人同我講佢嘅唔好，分化離間我哋，令我覺得佢唔係真心鍾意我。但係佢當時知道我係慢慢鍾意咗佢嘅，佢知道我鍾意佢之後佢就主動嚟問我“你依家鍾意邊個呀”，我因為受到人哋嘅影響所以冇主動同佢講我都鍾意你，白白放棄咗個機會。自從嗰次之後我哋再冇乜交流，由朋友變成陌生人。後尾我追返佢，佢冇接受，都好冷漠。我唔知點解我衰咗一次都唔識學精，放開咗兩個自己愛嘅人，留低人生中一段段紮心嘅經歷，想放低都做唔到，其實我識得珍惜佢哋，我就唔會有人生更多嘅污點，可惜沒如果。
要真真正正上咗最寶貴嘅一課係要經歷天人永隔嘅失去，詳情唔多講了。佢對我好好，照顧我嘅一切，我唔珍惜，覺得煩厭，成日攞佢出氣發脾氣，因為反叛多次嘗試離家出走，仲成日講希望快啲上大學住宿舍離開屋企。當有一日佢突然間離開咗我先醒覺，我又咁樣失去咗一個愛嘅人。可能我覺得佢對我好照顧我喺理所當然，佢一直留低陪住我成長都係理所當然，但係我發覺呢個世界係冇理所當然嘅事，任何人嘅付出更加唔係理所當然。
好後悔又點？好後悔都改變唔到啲咩，唯有記住呢啲教訓，好好去move on，唔再重蹈覆轍，做一個更好嘅自己，避免留低咁多嘅遺憾，放眼向前。我真係衷心希望大家唔好再步我後塵，好好把握自己珍惜嘅一切，珍惜眼前嘅人同事物。冇人有責任義務留低喺度等你，有啲嘢錯過咗一次就唔會有第二次機會，就會永遠失去，有機會嘅同時點解唔好好把握呢？係咪一定要失去過先識得珍惜？大家好好珍惜屋企人、朋友、愛嘅人，明白冇嘢係理所當然，心存感激吧。
*我只係希望用我嘅故事，教到大家，希望大家唔好重蹈我嘅覆轍。要屌就免了，因為一切係我咎由自取，我已經受到應有嘅懲罰，亦都唔係賣慘，唔使去可憐我，只係想將自己嘅經歷講出嚟，無論我想道歉嘅人睇唔睇到都好，令自己舒服啲，最希望幫到大家*
Sorry for 1999
Po ig thanksss