#NSS個人
[點解總係聽到人哋話屋企係避風塘?] 第一次投稿，文筆差請見諒🙇🏻♀️
好細個開始我就已經明白我哋屋企人唔係一個好嘅聆聽對象，係我印像中當我講出一啲唔開心嘅事就只會喺度笑，令到我唔再夠膽同佢哋傾訴， 成長當中我遇到好衰嘅老師，受到同學嘅排擠，我唔敢講出嚟，遇到唔開心嘅嘢都唔可以喺佢哋面前喊，因為佢哋唔鍾意； 見到親戚或我父母嘅朋友嗰陣一定要順應父母嘅意思，如果唔係佢哋會表現出厭惡
到我大個咗個心開始逐漸放低嗰陣，認為同齡人應該會理解我嗰陣，發現其實身邊同齡嘅朋友同學係理解唔到我嘅感受，講某件事出嚟嗰陣，佢唔會明白點解當時我要咁樣做？點解我會有咁嘅心情？ 可能係佢唔會遇到呢啲咁嘅嘢，可能係我太奇怪
所以我因此慢慢嘅壓抑落去，我認為我只要做到一個只會笑嘅木偶就得，做到我好似好正常咁樣，我就唔會畀佢哋覺得我麻煩，亦都唔會畀佢哋討厭
但總有一日支撐住木偶嘅線總會斷，就係我中二嘅嗰年，我做出咗一個以往都冇做過嘅嘢，我係我父母面前喊，希望可以睇心理醫生，但換嚟嘅都係佢哋相同嘅話語
[你睇下人哋屋企嘅都唔會好似你咁, 點解你就咁樣？]
[ 喺度無端端喊，都唔知你發咩神經]
[你有壓力都係自己攞嚟，係你抵死]
所以我嘗試自殘，但當嗰把刀掂到手嘅一刻，我明白其實我唔想起身體上留傷痕，我就用一支磨到好尖嘅鉛筆，係我嘅手臂反反覆覆咁樣寫上幾隻字(我想死)， 雖然手臂已經變到紅腫但只要唔會留下疤痕， 咁樣都可以接受吧？我嘗試令佢哋睇到我手上嘅字，我希望佢哋可以睇到我嘅訴求，但係冇，佢哋冇睇到， 我放棄了
大概 一年多前，我成日頭暈，想嘔， 頭痛，之後因為我去得診所太多次，轉介我去醫院，希望做番個檢查， 發現係有啲問題，雖然醫生就話唔會嚴重到影響生命安全， 但我父母卻因此俾壓力我， 成日認為係我玩得多手機引致，但係明明就唔關事
從呢件事開始本來就有少少失眠嘅我更難瞓著，去到而家我失眠得更加厲害，我已經好幾個禮拜係兩點幾三點幾先瞓得著 (我身體係支撐唔到咁夜先瞓覺)， 亦都可能係因為咁樣我開始食唔落嘢， 已經好肚餓但係睇住啲嘢食就只會有想嘔嘅感覺，係呢短短嘅一個禮拜有多嘅時間我瘦咗兩kg，可能長久落去我真係會英年早逝，但反而我嘅內心有個好似要解脫嘅感覺…
去到呢邊篇文都唔短，睇到呢邊嘅人多謝你，雖然你可能會覺得我有啲諗法好弱智 ， 不過都多謝你可以堅持到呢度!
(ㆁωㆁ*)♡