#NSS愛情
[HKONC] 小弟今年F3，喺F2開始功課超多，quiz同test日日都有，真係好大壓力。不過，啲壓力我都係擺喺心入面，因為我知道就算我講出嚟，都唔會有人明白我。
我就係咁樣渡過左一個好唔開心嘅F2，直到升上F3，我識到一個人之後，我完全唔同咗。
佢係隔離班嘅一個女仔，某日小息嘅時候喺樓梯見到佢拎住好多嘢，跟住佢唔小心跌晒啲嘢落地下，咁我就幫佢拎返上嚟，然後佢同我講咗一句「唔該」就走咗。毫無疑問我係一條毒L，平時都唔敢出聲，第一次有女仔多謝我，嗰一刻我就知道自己完完全全鐘意咗佢。
時隔一個星期後，我偶然搵到佢ig，然後大膽問咗一句「你係唔係… 嗰日嗰個女仔？」，之後佢覆咗我，嗰日我就係咁樣同佢傾咗半個鐘，我發現佢份人真係超好，明明只係第一次傾，佢都好似完全明白我咁，我對佢嘅好感又進一步上升。
就係咁樣，第二日我都主動喺ig搵佢傾，然後就係咁樣持續左一個半月，彼此嘅認識都越嚟越深，我甚至覺得佢係唯一一個真正明白我嘅人，傾嘅內容都開始變得曖昧，我都唔知佢鐘唔鐘意我，但係以我咁嘅毒L個性都係收得皮。
跟住我發現原來有好多人都鐘意咗佢，我亦開始想放棄，但係佢仍然主動搵我，所以我都未完全放棄，直到一次…
嗰陣時係2月，疫情爆發嘅時候，我都不幸中咗肺炎，正當我以為佢會關心我嘅時候，冇。佢一句關心說話都冇，我當然hurt爆，喺我發燒燒到41度嘅時候，我仍然拎住部電話，一心希望佢發一個message。
好啦，我都已經康復咗，佢一個message都冇send俾我，之前知道有好多人都鐘意佢嘅時候，我已經喺放棄嘅邊緣，經過埋呢件事，我已經真正放棄咗。
諗深一層，其實我好傻，佢又點會鐘意我，一條毒L根本唔識同人相處，就算佢都鐘意我，我都俾唔到幸福佢。咁不如我真正放棄，希望佢可以搵一個更加好、更加愛佢嘅人。
真正放棄咗之後，我由2月到而家一句嘢都冇同佢傾過，正當我以為自己真係放低咗嘅時候，其實我未。偶爾會再諗返以前同佢傾嘅時光，夜晚瞓覺諗佢諗到喊，發夢都見到佢。
其實我已經忘記初心，我只係想搵一個明白我嘅人，而唔係女朋友，但係我一同佢傾嘅時候又會覺得我同佢好似有可能，咁不如直接唔好傾？
我真係好矛盾，唔知你哋有啲咩建議？
毒L一個，sorry for 1999，admin 辛苦晒