#NSS個人
[GUEST] 幸福唔係必然
小妹今年中四，讀緊band 1學校。本身日子過得無咩問題，生活ok，但係第5波疫情搞到阿爸上個月失業。
阿爸係我地屋企嘅經濟支柱，本身薪水都算ok，日常起居無問題，仲會有多餘添。平時唔駛慳住洗，有時想買嘢屋企人都比。但係當阿爸失業就變得好唔同，佢當份工係寄託，依家無咗自然會頹廢，但係我地又唔想追問佢，唔想做成無形壓力。阿媽有做野，但唔可以剩係靠佢過日子。自己都有補習，最近更補多咗一科，補習費本身已經唔細，依家仲大咗。假日，工人姐姐唔係屋企，阿媽就只可以買兩餸飯返黎我地食，買餸要慳住慳住，搭最平嘅車。無辦法，係要捱。呢個時勢，搵工仲難，我地都唔expect阿爸咁快有得返工。
好彩阿爸失業係”暑假”開始，起碼我成個假期留係屋企無出街，車錢飯錢慳返，又要消費券，可以減輕啲負擔。但係就黎復課，平時搭車返學車費唔平，又會日日同frd出街食飯嘅我，依家諗一個禮拜出面食一次飯已經好多。行街就唔駛諗，因為我唔想加重阿媽負擔。但係，好驚frd會發現我嘅轉變，我會好介懷，由以前咩都msw到依家要慳住，我唔想同frd講我依家嘅狀況。
我間學校小學要比唔平嘅學費，可能係咁，學校周圍都係有錢家庭，屋企唔係高薪厚職，就係做生意，個個同學朋友都大洗，好似無經濟問題咁，就算係疫情都無阻，所以我諗無人係體驗緊我依家嘅狀況，亦都可能未體驗過，根本唔會明我嘅感受，又因為係家事，都唔想外揚，所以屋企嘅現況無人知。有時又諗之後見住朋友們可以無拘無束咁消費食飯，少不免都會有羨慕同埋自卑嘅感覺，有時都會情緒起伏，幾晚係度諗點解撞著係我遭殃，但係只可以收埋係心度，就算係屋企人我都無傾關於我嘅心聲，阿媽已經有幾次同我申訴，明白佢嗰種艱苦，所以我唔想加重佢嘅擔心，唔想佢知ks我因為呢件事唔開心，就係咁，收收埋埋咗個幾月，每次諗都會喊得更犀利，但我唔知有邊個可以傾訴，無助。
我知呢件事根本無得怨天尤人，只可以話係命運嘅安排，或者係每個人都要經歷患難，我嘅患難就係屋企家境突然唔好，壓力大，所以想同大家講，幸福唔係必然㗎，可以無啦啦有一日過簡單生活都有困難，依家有飯食有學返有車搭嘅你，係好好好幸福，唔好申窮，記住要好好珍惜，因為今日唔知聽日嘅事，無嘢係必然。
我知道自己唔係最差嘅case，可能本身社交圈子都係啲朋友家境富裕，所以先搞到自己唔覺意比較，產生自卑，但係打擊還是有的。依家只可以心存盼望，祈禱希望奇蹟出現，等阿爸可以有返咁快工作，阿媽就唔係咁大壓力，過返啲好嘅生活吧！
ps我表達能力唔係咁好，請體諒！