#NSS個人
[GUEST] 中學三年，不過乜朋友都冇
小弟今年中三，有一個問題，大家都知，係2020年開始，因為有肺炎所以就成日停課，冇得返學，所以基本上冇乜時間識其他人。
2019年中一開學嗰陣，就係因為社會事件，如果想識人，就一定要係課室唱願榮光先會有人理你（唔好問我點解）不過我就開學下一日先背到，嗰陣時大部份人已經搵到friend，不過我仲未搵到一個…
不過我就覺得，個開頭衰咗，仲有一年時間比我識人。可能我慢熱啲，到12月就快考試先有第一個friend。我覺得之後仲有機會嘅！
不過之後就開始疫情，全港停課，我又唔識潮流野，又冇ig（我當時唔知ig係乜）所以6月返返學就見到基本上全班已經好熟，除咗我。7月有日上堂，有同學問我係邊個，係咪新同學。我直接呆咗，大佬，我吔同班咗就快一年啦，竟然唔識我？
冇錯，我係比人無視咗，甚至連自己班嘅WhatsApp group都唔記得加我（因為WhatsApp group係1月宣布停課嗰日先開，不過我到2020年暑假先知）
中一就失敗左啦，我就希望中二可以識到朋友。不過好唔好彩，中二係10月先可以第一次返學校見新同學，不過佢哋已經係ig傾到好熟，所以就冇人理我。於是我就走去開ig，睇吓可唔可以同啲同學傾下偈。
唔知個天係咪玩我，我開咗ig兩個禮拜，就因為有半班同學上堂自拍post相上ig，然後又比老師發現。之後有一個同學竟然話我係二五仔同老師講。吓，我同你都唔熟，做乜老屈我？我仲要係未follow哂全班嘅ig喎，點出賣你地呀？不過當然冇人信我，之後我ig同WhatsApp就比大半班同學block咗，大部分仲要係冇講過野添。我係令人識我，不過佢哋係覺得我係壞人、二五仔。中一識嗰個同學都唔再理我，仲要block我添。之後佢哋自己開咗個冇我嘅班group，然後排擠我。
好快就中三，我希望有個全新嘅開始，但係中一同中二要friend嘅就friend咗，佢哋仲愈來愈close。而我就愈來愈邊懸。見到佢哋可以有十幾個朋友係暑假度一齊出街玩，而我就自己一個係屋企冇野做。我真係好羨慕佢哋呀。
聽日就復課，我只希望我初中可以識到一個朋友就好滿足，多謝。