#NSS學業
[GUEST] 為自己被香港教育制度幾近奪去的資優敬輓
講返小弟嘅背景先啦，我中四，只不過係喺油麻地兩間名校之間嘅平凡中學嘅學生
自小學起，我一直不斷攞到學業成績優異獎、全班第一……等等諸如此類嘅學術性獎項，直到中三嗰一年
回想舊年，自己突然間對學習完全一啲興趣都冇，唯一有興趣嘅只有哲學、倫理呢啲喺中學無法接觸到嘅科目，唔知點解對（學校內）學習覺得冇興趣，久而久之隨着咁樣嘅心態，上學年統測成績突然間跌到好似恆指之前嗰排咁，當然學校都有通知家長有關咁嘅事
時間先就要跳一跳返去十幾年前，仲讀緊小學嗰陣時，當其時我嘅智商檢測係13x（實在抱歉唔可以明講，不過可以比到係131-134其中一個），但係我屋企人選擇埋藏呢個秘密，所以無論幼稚園、小學、或者中學，學校冇人係知道我背後嘅秘密
返返去我屋企人同學校開會嘅時間，咁我哋學校融合組嘅老師就聲稱好關注我，就覺得我係唔係有啲乜嘢特別學習需要，覺得我係自閉症，咁當然我屋企人就覺得唔係，之後就繼續讀落去直到今年二月，執屋嗰陣時我無意中發現到嗰份智商檢測結果
發現咗呢份結果同屋企人傾過之後，咁我老媽子都承認咗呢個的而且確係我嘅智商記錄，但係佢好希望我平凡健康快樂咁成長，所以選擇一直唔坦白呢個事實俾我，亦都冇帶過我去資優教育學苑，我老竇就覺得其實人資優唔資優都冇乜所謂，最緊要開心做人就夠，但係呢一刻嘅我唔知點解突然間轉變左，覺得既然背住資優呢件既係祝福亦係詛咒嘅天賦或責任，點解我唔可以比自己成績變得更加好，就可以做到學校成日同我哋講：「讀好啲書攞到好成績讀大學先係你最美好嘅未來」呢？
坦白講，以前無論幼稚園小學定係而家中學啲老師，對我嘅評價連成績表都係好聰明，天資聰穎……不過我回憶起讀書呢段過去，好似嗰陣時聰明伶俐嘅孩子，慢慢接受喺精英教育嘅香港教育系統，彷彿佢慢慢咁沉溺，最終死去
一年又一年，我嘅聰明才智有如一直慢慢失去，又像受到哲學影響，過去失去嘅才智又慢慢回歸，再咁落去，究竟我嘅才能有冇可能喺學校上面發揮？我又要渡過呢幾多個永劫嘅輪迴，先能夠將我嘅聰明展露？
香港教育制度，毋庸置疑根本冇針對資優生客製化，呢個係無法否認嘅事實，尤其係在於好多資優兒童都係偏才，或者佢哋藝術、創造、物理、數學、文學係天才，但係香港教育有曾幾何時有重視過呢啲可以係未來能夠閃耀天際嘅星辰呢？過往我一直被灌輸一定要讀好啲書先諗其他嘢，不過或者咁諗完全大錯特錯，難怪香港資優兒童出現率幾高，同等隕落嘅機率好高，或許係我寫緊呢篇文嘅時候亦都有一個資優兒童嘅才能被埋沒了
幸好，我屋企人決定，，能夠在即將降臨嘅明年一月送我前往海外讀書，佢哋真誠希望人在海外嘅我能夠搵到自己失去良久嘅才能，將佢發光發熱
最後，想同每一個見到呢篇文章嘅同路人講句：「加油！唔好比資優呢個名束縛自己，最緊要能夠搵到自我，發揮才能！」