#NSS家庭
[GUEST] 【長文慎入】求admin 出post
本人第一次投稿，講嘢可能一舊舊，請各位高抬貴手，要屌的唔該細力d同埋希望大家可以畀少少意見。
講返少少背景，小妹今年form1， 讀緊band 1 中學，屋企算係中產家庭，冇兄弟姊妹。我嘅家庭背景同埋父母對我嘅期望搞到我好大壓力。
【以下內容係100%真實】
我個人認為我阿爸嗰邊嘅家庭背景好恐怖，成個家族嘅英文底都非常好，無時無刻都畀緊壓力我。首先，我阿嫲七十幾歲仲幫我補緊小四，小五d英文同數學， 講到呢度你哋實覺得佢喺度亂教教到我錯曬，但係我因為佢d成績先回升。(p.s. 我而家諗返先至覺得我阿嫲好勁) 跟住我大伯，我阿爸，我阿叔喺香港讀完初中(band 1) 就去咗英國讀boarding school，值到讀完大學， 就連遠房親戚(一年先見一次嗰啲) 都喺外國讀埋U先返嚟香港。重點嚟啦，我喺我阿嫲嘅7個孫入面最廢嗰個。 一個堂妹就去咗澳洲讀書，有三個就由細到大都讀國際學校，有兩個小四都未讀完就去咗英國讀一間幾top嘅boarding school。至於我點解讀到band 1 中學就因為小學呈分試嘅時候唔知黐咗邊條根，四個主科都straight A，先至考到而家呢間中學。嗰陣時我阿嫲勁開心， 主要原因係英文嗰科入面咁多份卷入面都係A。最難頂嘅係， 平時啲親戚去探我阿嫲都係著自己喺香港讀嗰間中學嘅T-shirts或者Hoodie，大大隻字寫住學校名(一睇就知係band 1)， 傾計嗰陣時唔係講金融投資就係講醫療嘅嘢，真心難頂。
跟住就係父母對我嘅期望， 近排我嘅父母就想我去英國讀boarding school，其實佢哋一直都想我去，加上而家呢個時勢，佢哋就更加想。我不嬲都唔抗拒去外國讀書，但係聽到佢哋話我一定要畀心機讀書因為啲學費好貴嘅時候，我就覺得好大壓力，好驚讀唔掂嘥曬佢哋d錢，因為佢哋為咗供我讀書差唔多用曬成副身家。
淨係呢兩樣嘢都搞到我壓力爆曬煲，但係我可以點？
sor for 1999