#NSS學業
[GUEST] 小妹依家中五，學校banding唔算top,大概band1C, 中一嘅時候校內成績唔好，中後左右，但一直有進步到依家全級頭十，但都知出到去公開試同啲band 1A嘅名校生根本冇得鬥。自己有諗過讀啲神科（醫），想醫人、救人，但知自己未夠班，所以一直都唔夠膽同屋企人、老師講，驚佢哋反對/對自己要求、期望高，只會自己偷偷地睇讀醫嘅資料，可能大家會覺得我睇緊啲無謂野、浪費時間，因為我都冇乜能力入醫科。
我今次考到頭十之後，其實老師都已經對我期望愈來愈高，我都感受到好大壓力，被人哋過份重視嘅感覺都幾可怕。。。
而假期前本身都算會做齊功課，但冇啦啦放咗個「暑假」，本身諗住7-8月嘅暑假先開始操卷，但乜計劃都變曬。諗住呢個假操卷，但要應付功課、測考，發現自己嘅拖延症嚴重咗，做1個鐘嘅功課要做成3個鐘，成日分心、坐唔定，之後就走咗去打機、煲劇。同埋好多都未教曬，結果冇操過卷。
我呢個假期hea咗好多，求其做咗啲功課就不停打機、煲劇，都有想溫書都真係冇動力，假期一日一日咁過，依家完曬，好快又UT。感覺自己會大退步，因為之前真係用盡曬力先可以考到頭十。又成日覺得其他人一定好好利用呢個假期溫書，人哋升2-3個grade, 我就冇進步過，真係好驚。。。而家做好多嘢都力不從心，不論係音樂方面定讀書方面都係。
加上我屋企唔大，300-400尺 一個4口住，日日困喺屋企，有個細佬，成日都好嘈咁打機。爸爸放工仲嘈啲，佢哋一齊打機，又無啦啦大叫。我同佢哋講要溫書，試過鬧佢哋，但佢哋都唔理，連我媽咪都冇佢哋辦法。可能你哋會覺得只係藉口，但我喺嘈嘅環境真係專心唔到。
經過呢個假期，我覺得好大壓力，一次過又好多嘢殺到埋身，雖然21號已經開始網課，但仲未覺得係開始返學。依家成日都瞓唔著，氣管好似被石頭壓住咁，好似抖唔到氣。
同埋發夢自己已經考緊DSE，會瞓瞓吓嚇醒，以為自己遲到，鬧鐘冇響咁。
不過上堂都ok精神嘅，但成日壓力好多，心很累。
有時都會發脾氣/對屋企人嘅態度差，有時佢哋唔記得我講過嘅嘢，我會唔耐煩。其實我唔想㗎，但控制唔到自己。
想問大家有冇咩方法pick up返溫書、做功課？同埋做啲咩可以幫我減吓壓？我驚我捱唔到去DSE🥲
唔該曬admin 🤍🤍
Sor for 1999