#NSS個人
[Guest] admin麻煩po IG🙏🙏🙏唔該
係咁嘅，小妹今年15，有打開拳，我好鍾意呢項運動，因為我讀書成績好差，泰拳係我唯一鍾意又比較勁嘅運動，以後都會想參加下啲比賽咁。
琴日練拳踢沙包嗰陣失咗平衡，菠蘿蓋移咗位跟住跌落地，即刻痛到慘叫，然後call白車送咗去醫院。
醫生話我之前都試過咁，可能會變成習慣性甩骹，而且今次搞到我軟骨碎裂，韌帶都傷咗。雖然話唔使做手術，但我好幾個月冇得練拳，明明上一秒踢沙包仲踢得好過癮，下一秒就攤喺床到郁唔到，真係覺得自己好廢，麻煩到我爹哋媽咪，又令身邊嘅朋友擔心。
聽到幾個月冇得練拳，我真係好唔開心好絕望，唔知接下來幾個月應該點樣渡過，再加上本身有情緒病，我直接喺醫院熄燈嘅時候崩潰爆喊，喊到對眼又痛又腫，依家番到屋企諗起呢件事，甚至係打緊呢篇嘢嘅時候又會忍唔住喊，差唔多10分鐘就會喊一次，我驚自己幾個月冇做運動就會肥番，驚肌肉量跌番，又驚復操嘅表現直線下降，驚自己因為情緒問題而做傻事，呢幾個月完全冇一樣嘢去俾我發洩情緒，我真係唔知點算。
我接受唔到冇咗泰拳嘅生活，我真係好鍾意好鍾意呢樣嘢，唔知依家除咗養傷應該點算好。多謝大家睇到呢度，希望大家可以為我打下氣，等我舒服少少，多謝晒！
sor for 1999