#NSS家庭
[GUEST] 我應唔應該繼續學琴
小妹今年F2 學咗鋼琴大概五年，而家我仲係用緊部電子琴嚟練琴。
講返個背景，我大概四年級嗰陣想學鋼琴，然後阿爸阿媽都答應咗，但係因為屋企本身已經有部電子琴，所以佢哋應承我學高級少少(大概grade3-4)先至買部鋼琴俾我，然後我而家已經考咗七級，仲未買鋼琴。我之前考完五級老師已經不斷催我快啲買鋼琴，阿爸阿媽都係好敷衍咁樣認咗就算。
到而家考完七級，老師終於忍唔住打電話嚟叫我哋買部鋼琴，因為佢見到我平時上堂彈鋼琴個樣好唔慣，然後我阿媽都答應咗會買，但係阿爸唔係好想買。如果我哋買部鋼琴嘅話，就要揼咗個櫃，雖然櫃入邊大部份嘢都可以揼，但係都要買掛櫃嚟，然後阿爸唔想搞。
然後我都嘗試繼續用電子琴練琴，但係電子琴真係好X難彈。有學鋼琴嘅應該知，電子琴嘅按鍵力度比鋼琴輕好多，大細聲好勉強先做到，連音做唔到，連Pedal都冇，彈蕭邦唔知自己彈咗啲乜。其實我哋屋企唔係冇錢(當然唔係有錢)，但係一定afford到鋼琴，但阿爸就係唔想搞。咁然後其實我有出琴室練琴嘅，但係我冇可能日日都出去㗎嘛，然後而家疫情咁嚴重，阿爸阿媽又唔俾我出門口，所以就基本上我一個月可能淨係去到嗰度四五次左右，加上阿爸嫌琴室貴，同埋我好宅，唔想去。
上個禮拜我終於忍唔住問阿爸點解一直都唔肯買鋼琴，佢唔肯答我，我問多幾次佢終於忍唔住鬧我：「你做每樣嘢都三分鐘熱度，我嗰陣以為你學一陣就冇興趣放棄，我點知你真係學到而家姐！」到嗰一刻我先知道原來阿爸一直冇呢個打算買鋼琴俾我，然後嗰晚阿爸阿媽因為鋼琴嗌交，連續嗌左幾日，嗌到爭啲離婚。我平時碌IG見到有啲人屋企有鋼琴我都好羨慕，見到有啲朋友個grade 低過我都有部好嘅鋼琴可以練，我好妒忌佢地。
我就唔想因為一部鋼琴嗌大交，但係我又好想繼續學鋼琴，然後我知道唔練鋼琴我一定唔會彈得好，我可以點做？我應唔應該放棄？