#NSS家庭
[GUEST=]] 你冇養過我 點解要我養返你？
.
（篇嘢有啲長）
事原係今日下午，我阿爺問我點樣wechat視訊通話同老竇傾計，咁我就撳俾佢la。
一開始呢，我老豆正常同爺爺講下啲乜屋企人八卦之類嘅啦，之後呢，我阿爺又叫我同老竇傾下計
爺爺：你唔使同你老豆傾下計嘅咩？
咁我咪過去囉。
.
之後老竇就問成績，我知道父母關心成績係冇錯嘅，但係佢次次打電話嚟，或者我哋打電話過去，佢次次同我講親都係問成績。
.
小女今年f2，讀緊沙田區一間band1A中學。大家都知band1中學大部分都是英文教學。咁我本身個人嘅banding 1C1D咁啦…咁我都係緣份抽到去band1A 。
老豆老母家姐細佬係大陸，我一個同爺爺
係香港，因為covid老豆一家而家出唔到嚟
.
老竇問咗我成績 我答返一般般噉la
（其實唔太掂） 之後佢就開始講1大段嘢
老豆：一般般？次次問你都一般般嘎？
你ABCD成績係咩？
我：B咁上下啦..
老竇：淨係得B？你咁樣嘅成績 將來點樣考大學啊下？點解搵份好啲嘅工？即係你B即係啱啱好合格嗰啲啦！
我：（保持沉默但心中已無奈）
老豆：我同你講 係香港呢讀唔到大學係搵唔到份賺到多啲錢嘅工嘎。你搵唔到錢點養爺爺爸爸媽媽同細佬家姐啊？
我：（…）
老豆：那你睇下，阿表妹同表哥佢阿媽有條件俾佢哋補習，咁人哋第日搵份工咪5～6萬1個月囉，咁你呢？你考唔到大學淨係揾到萬幾蚊，點養我哋啊？你同人哋（表妹/frd）出街啊！次次都人哋哂請你食嘢 你好唔好意思啊？ 咁你睇下賺到5～6萬咪唔使咁囖。
我：（之後我就一直冇講嘢咁聽佢9up）
老豆：那咁我又冇條件同你補習，咁你自己就要勤力啦，唔好成日都人哋叫你你先勤力啦！成日睇手機把鬼咩？成日睇埋啲無謂嘢？睇呢啲嘢幫到你學習咩？成日睇埋啲咩韓國嘢啊…日本仔啊咩啊…睇啲嘢有咩用啫，勤力啲讀書賺多啲錢唔好咩？
我：（自己知冇條件就好啦，我已經好勤力啦，我又唔係band1A，我1個band1C係1A學校度讀，真係好辛苦嘎，我又唔係嗰啲水平。同埋睇手機唔一定係睇無謂嘢，點解追星一定係啲無謂嘢呢…）
我：哦…
老豆：我哋屋企唔富裕，就真係靠你啦，你讀好啲書 賺多啲錢 養我哋，靠你呢一代嚟改變架啦..
我：（…）
老豆：點解次次打電話俾你你都好似唔敢同我講嘢咁？你驚我食咗你咩？
我：（就係因為你次次講嚟講去最後都係講叫我考大學，叫我賺錢，叫我養曬冚家）
老豆：xxx，你可唔可以由聽日開始改變，唔使人叫就勤力D la 。真係靠你讓我哋嘎啦
我：知道啦…
.
之後就cut咗線啦，收咗線之後我就狂喊（唔係扮可憐），真係唔知點解次次打嚟都叫我考大學/賺錢。其實講唎啲嘢嘅時候有冇考慮過我係咩感受嘎？我14歲咋 點解要將你想做但做唔到嘅野推曬俾我？我仲有家姐同細佬，佢講電話永遠都唔會提及家姐同細佬，淨係識叫我考大學 考大學 賺錢 賺錢。講到係靠我賺大錢，然後養曬成個家族..
.
我知道哩個世界好現實，好多人都好現實，係香港地 冇錢真係做唔到d咩。我知，叫我讀大學賺錢都係為我好啫，講咩都話為我好嘎啦..我唔知咩？
.
但係老豆除咗關心我成績就冇關心過我其他嘢。而且佢係我一出世佢就係大陸，冇乜用過心照顧我，書簿費啊，電腦，垃垃雜雜嘢，翻學要用嘅嘢，啊全部嘢啦..都係阿爺俾曬錢，佢係老人家，我都唔想成日都使佢啲錢架，咁我又冇得賺錢
次次都話係啊叫爺爺俾住先啦，下次俾翻佢囉。但係次次都冇俾翻爺爺..你都冇養過我 又點解調轉頭嚟要我養返你？
（唔知有冇打錯字🙏🏻）
求Admin post 🙏🏻🙏🏻🙏🏻
哩篇嘢都係攞嚟發洩下 因為真係太過激氣。要屌就隨便你