#NSS個人
[Guest] 大家好，小弟f4, 阿爸阿媽諗住喺我中學畢業前送我去外國讀書，但係我其實唔係幾想。
我而家讀緊chem phy bafs m2, 呢四科都係我鍾意嘅科，日日都有得上呢啲堂真係好開心，我想完完整整考埋個dse
我學校啲老師大部分都好好人，肯花時間教啲成績唔好嘅同學，尤其係中文老師可以將我呢個之前次次都唔合格嘅蠢材，教到去6字頭。其他老師都付出好多，令到我哋全班啲成績都好好。
我每日返學都好enjoy, enjoy同同學玩，enjoy上自己鍾意嘅堂，如果要走，我真係會好唔捨得。加上我由f1開始已經諗住係考dse, 呢一年仲為咗dse改咗溫多咗書，我仲成日幻想自己放榜嗰刻，如果我f6唔係考dse, 我會覺得好可惜。
再加上我嘅夢想係大學讀science, 之後做科研，做返小小成就，令香港科研界受到重視。聽落不切實際，但係呢個的確係我嘅夢想，由f2開始一直都冇變過，如果冇得實現呢個夢想，我覺得我讀書都係冇意義，佢係我嘅動力。冇錯，喺外國，科學家嘅地位比較受到重視，但係我要嘅係香港科研界受到重視，喺外國受到重視咁又點？根本係兩樣嘢。
仲有好多好多嘅原因，總之我好唔捨得香港嘅好多嘢，叫我轉校我都唔捨得啦，何況係要去外國。我問過阿爸阿媽，佢哋想我喺嗰度讀埋大學，我真係好唔想離開香港咁耐。
我明白我屋企有能力送我去外國，我應該好好珍惜，但係留喺香港我開心，我而家間學校同八大又真心唔差，以我而家嘅成績估計，我應該係穩入八大甚至三大，去到外國我要重新適應，成績仲可能入唔到好大學，咁唔係留低好啲咩？不過我又唔想嘥咗阿爸阿媽一番好意，有冇人可以話我知點同佢哋傾？
sor for 1999