#NSS個人
[Guest] 希望呢篇會po IG
是咁的，我有一個人生成就想完成。
在下自問就快中六，都已經冇乜時間做呢啲嘢，但係我點都係想喺我畢業之前plan好、開始，甚或是做完呢一樣嘢。
我想同人一齊畫一個漫畫故仔，紙本又或者電子都好。
唔係為攞獎、賺錢又或者成為職業漫畫家呢一啲明確嘅目標，有啲嘢就係想做就應該趁後生嘅時候去試下，至少我係咁樣認為嘅。
雖然我而家仲係學生，但係都有寫緊小說，算係業餘，參加過啲比賽，但係最勁都係止步十強。畫畫方面係識少少，但係未到專業級，分鏡、設定、劇情、點樣投稿都略有認識。自問唔係一個非常叻嘅人，但係我相信點都有人有諗過，又或者宜家已經實行緊嘅，去畫一篇漫畫出嚟㗎嘛？
可能有啲人會覺得嘥時間，又或者笑我，但係我覺得有啲嘢想做就一定要趁早去做，如果唔係遲下再冇呢一份心力去做就盞一世遺憾。
所以，為咗達成呢一個理想，又或者我稱之為「人生成就」，我而家喺度公開招募同伴。自己就應該做唔成主筆，但係論劇情、鋪排我都算係有少少信心，因為我都有啲經驗，大概會擔任所謂漫畫「原作」嘅角色。咁我就比較擅長懸疑灰暗啲嘅style，即係所謂嘅邪道故啦，咁但係熱血都ok，戀愛青春就有少少棘手。
最後，人不輕狂枉少年，如果你都有呢一個夢想，就算得少少功底都好，comment留名，我會聯絡你，我哋一齊完成呢一個瘋狂嘅計劃。雖然我唔識你，你唔識我，一切都係未知之數，但係冇人知道結果會係點㗎嘛，如果唔開始，就會連結果都見唔到。
如果我真係咁好彩搵到同伴，而又啱傾嘅，咁我呢個plan大概喺8月左右會開始。
唔知大家有冇睇過一套經典嘅動漫呢？如果你有興趣嘅話，我願意做你嘅高木秋人，你又想唔想做真城最高呢？