#NSS個人
[Guest] （長文）首先做少少背景簡介，我有兩個close frd，係度我叫佢哋做X 同Y。至於我父母嘅管教方式，可能同其他人有啲唔同。例如我可以出街嘅次數，就比其他人少。有時出去或者返屋企通常都要大人（工人姐姐）一齊，不過呢排都多左自己一個返。呢啲野我之前都有啲介意，但係我父母係注重講道理嘅人，我都明白佢哋點解會咁樣做，雖然介意但係冇不滿。
咁我接受左呢件事就會慣咗啦，X 同Y都慣咗，但係呢排我就覺得好似發生咗啲轉變。
有一次我、X同Y一齊出去食飯，咁我就間唔中會whatsapp 父母話我係邊，影吓相咁。呢個係習慣亦都係話比佢哋聽我安全。走嘅時候我同XY 講拜拜，X就加左句「返到去記得話俾我哋聽呀」，跟住大家係到笑。咁我個陣覺得冇乜嘢，但係返到去就覺得有啲反感。第一，個度係商場，係公眾地方，佢隔住四五米喺度嗌，都唔係咁好啦。呢樣都算啦。第二樣嘢就係佢嘅語氣。佢咁樣講好明顯就係對住我平時嘅習慣嚟講，佢仲要用一種有啲取笑，好似扮緊我父母嘅語氣去講。咁我就覺得有少少唔尊重我父母。雖然我父母嘅管教方式有啲唔同，我從來都唔覺得呢樣係一件令我不滿嘅事，X 嘅父母可能比較自由，但係唔代表可以攞呢件事嚟好似取笑我咁。
有另一次，因為而家疫情越嚟越嚴重，要放暑假，咁我哋就要返學校攞嘢啦，咁我就同我阿媽一齊返去，算係跟住我之餘亦都可以幫手攞啲嘢。咁就嚟返到學校，對面街就有人無啦啦勁大聲嗌我個名。咁我唔使望都知道係邊個嗌緊，嗰個人就係X，而Y喺佢隔離喺度笑。咁就嚟行到學校門口，咁我哋就距離近啲，跟住佢就講左句「我哋陪你行到呢度啦，拜拜」我都覺得佢地好人嘅，特登兜返轉頭佢等埋我先走。但係，佢又一次用嗰種語氣，令我覺得好反感。我阿媽就係我隔離，佢就用個種語氣去講，雖然我阿媽唔知X有少少扮緊佢，但係我都覺得佢好唔尊重。仲有，佢又一次隔到鬼死咁遠勁大聲嗌人，雖然今次條街冇乜人，但係唔通冇人就代表可以咁？佢可能係一個比較開放嘅人，但係咁樣做都始終有啲失禮。
雖然我哋做左frd好耐，呢啲只不過係一個好細嘅事件，但係對我嚟講都算係好突出。X平時比較認真嘅語氣，絕對唔係咁。佢有時都用呢種語氣同我講嘢，搞到我好似成個細路咁。我係就係為人比較衝動心急同埋自尊心有啲高（個人認為），但係我有努力去改，何況呢樣野唔應該由佢管。好啦，有少少離題。
講返重點。我想要嘅嘢好複雜咩？唔係。其實好簡單，我只不過係想XY尊重返我父母嘅管教方式，我父母可能比較”嚴格”，但係唔代表我冇自由，只不過係冇咁”表面上”嘅自由，XY冇咁易睇到咁解。仲有，我父母唔係唔講通理嘅人，唔俾一樣野都會講到明點解，有一個合理嘅解釋(我覺得呢樣嘢好好）。我覺得XY (尤其係X）好似停留左係「唔得」呢件事，睇唔到背後嘅原因，覺得點解我都咁大個人囉(佢地觀點），點解唔可以好似佢地咁自由。我都明，但係佢地表達出嚟嘅方式就未必咁好。
我都想同佢地講我想要返少少尊重，但係以佢地嘅性格我覺得佢地唔會認真看待呢件事。究竟我應該點？