#NSS愛情
[GUEST ] 小妹我文筆好差，篇文可能有好多錯字。Sor for 1999🙇🏻♀️🙇🏻♀️🙇🏻♀️ 長文慎入
從嗰一刻起，我覺得自己真係好污糟。
小妹而家13歲，我嘅ex而家16歲。我哋係喺IG識，嗰陣佢dm問我係咪同一間學校，咁我就答佢係。之後，我哋都一直有傾計。
過咗一排，佢就問我一唔一齊。因為嗰陣都有啲啲鍾意佢，所以就應承咗佢。（呢個絕對係我人生中做過最錯嘅決定）
喺頭嗰幾日，我仲都覺得自己好幸福，仲都好無知咁活喺呢個所謂嘅童話故事。但係，直至到有一日，佢開始提起關於性呢樣嘢。
內容大概如此（可能有幾隻字唔一樣）
Ex : 我身邊有啲frd十三、四歲就破咗處喎
我：吓？！我接受唔到呢件事囉
Ex：有咩接受唔到啫
Ex：而家好多人都係咁㗎啦
我聽到佢咁講我真係呆咗，完全唔知俾咩反應好。不過好彩嘅係，喺嗰一日佢都冇再提過性。但係，佢之後都會不斷咁提起。嚴重嘅試過傾4個鐘電話，佢淨係講關於性，不停話自己好羨慕，我聽到好辛苦好大壓力。
但係估唔到事情發展到一個不可收拾嘅地步。嗰日佢叫我去搵佢。因為佢淨係俾咗個地址我，我唔熟嗰邊。但萬萬估唔到，佢竟然拉咗我入殘廁。佢好粗暴咁撕開我件衫，然後強迫我同佢發生性行為。我聲嘶力竭咁大嗌救命、唔好。可惜，嗰度位置好偏僻，冇乜人經過。我嗰陣覺得世界上冇人可以救到我，一絲曙光都冇。
佢做完所有嘢之後，就自己離開係一個咁污濁嘅地方。而呢個地方就剩返我自己同埋我嘅哭泣聲。過咗一陣，我執拾好自己，好痛苦咁樣離開呢度。但係嗰陣嘅我邊度都唔敢去，更加唔敢返屋企面對屋企人。我覺得自己真係好污糟。世界上好似容納唔到我。我去到屋企附近嘅公園，坐低咗差唔多成個鐘，先至肯返屋企。
因為唔想令到屋企人擔心，我選擇逃避呢個問題。扮到自己好似平時行完街返到屋企咁，一樣咁嬉皮笑臉，實際上只係強顏歡笑。去到深夜，嗰一晚我完全瞓唔着。之後都不斷發惡夢，無一晚瞓得安樂。我不斷咁諗，點解受傷嘅要係我？而點解佢就可以繼續逍遙快活？
但係件事仲未完，佢一次又一次咁威迫我。而我一次又一次俾佢傷害自己。我覺得自己真係好傻，我自己都唔明點解當時要咁做。
但係始終紙包唔住火，喺年初二呢件事俾我媽咪發現咗。佢拉咗我入廁所，大大力攬住我。嗰次係我第一次見到媽咪喊，媽咪係我心目中係一個好堅強嘅女人。眼淚喺佢眼眶湧出嚟嗰一刻，我攬實佢。用顫抖嘅聲線同佢講：「我冇事㗎」而媽咪不斷同我道歉，話自己冇好好保護我。我想喺呢度講，你已經係我心目中最好嘅媽咪，錯嘅並唔係你。
不幸中嘅大幸係我肚入面冇生命。但係事隔半年，我仲都放唔低呢件事，一直耿耿於懷。喺呢度我奉勸咁多位，網上面識人真係要謹慎啲，真係要帶眼識人。不論男女都有好好保護自己，唔好比壞人有機可乘。
希望admin po IG 🙏🏻