#NSS個人
[GUEST] 04年 今年DSE
自問對DSE睇得唔重，因為唔想比太大壓力自己，但係就算冇學業嘅壓力，都好多好多其他問題纏住我。
阿媽賭錢販毒，入左去坐。屋企個阿爸唔係親生，對我同屋企兩個細佬不聞不問，所以我15歲就出黎賺錢養自己、照顧細佬。但係我玩開運動，要用好多錢，所以每個禮拜都好忙，忙住返工。喺學校係學生領袖，有啲咩學校都私底下搵我傾。屋企有個長期病患嘅公公，但係上個月過左身。就算有幾多事發生，有幾多責任在身，我自問全部都處理得好好。直到今次停課，我實在撐唔住了。
自己鍾意左個男仔6年，同佢糾纏左6年，最近終於終於叫做放低左佢，佢曾經係我返學、生存嘅動力，但係唔知係咪因為佢從我嘅生活消失左，我好似冇左個支柱咁，習慣左有佢嘅存在。加上疫情令到好多舖頭都唔開，我老豆間公司都唔例外，佢依家每日喺屋企睇片、食野，由朝到晚都係咁，過得好chill，但係我完全冇私人空間。就黎考DSE，所以我都返少左工，諗住喺屋企專心溫書，但係佢每日喺屋企hea，搞到我完全冇地方溫書，我冇自己一間房，間房比細佬霸住，更加唔適合我溫書。我都唔介意佢喺屋企同我一齊生活，但係佢嘅性格，少少唔順佢意嘅野就講曬粗口發脾氣，邊個想同佢相處。所以我到依家都只係睇過下啲書，每日匿埋喺間房到過。但係每日都要聽佢問候我母親，好辛苦。唔知係咪太耐冇出街，冇見啲frd，成個人都好down，可能係之前儲埋嘅壓力，每日一到夜晚就開始喊，喺到諗我嘅人生有咩意義，好似為生存而生存咁，遲早都係死，點解我要咁辛苦生存咁耐先死，每晚都希望自己一睡不醒…我曾經嘅目標係奧運，但係依家連跑步嘅動力都冇，我知做運動心情會好啲，但係我依家做運動都會成為我嘅壓力。自己有追開星，BTS同BTOB，每次睇佢地的確好開心，但係我知道佢地都只係填補緊我心靈嘅空虛，我用盡所有方法令自己開心返，但係就係開心唔到，要對住外人先可以自然咁笑到。
生存得好辛苦，所以搵左學校社工傾，佢不嬲都有follow我屋企嘅事同我嘅情緒，但係唔知係佢唔get我定係我講得唔清楚。佢淨係覺得我係因為DSE太大壓力，所以情緒先唔穩定，但係我自己好清楚唔係咁樣。
自己都有好多可以談心嘅朋友，但係唔想比佢地知我原來係咁嘅狀況，一直以一個完美嘅狀態呈現比佢地睇，唔係話收收埋埋好似神秘啲咁，而係我唔想咁赤裸裸咁喺佢地面前，每個人都有一啲唔想比人知嘅野，但係我太多野唔想比人知。
我好清楚知道其實自己想要啲咩，就只係想有個人可以撐住我，做我條柱，好想每日都聽到有人關心我，安慰我。個個都話先苦後甜，咁我要苦幾耐先等到甜，我驚我會等唔到…