#NSS愛情
[GUEST] 我而家真係好掛住以前同佢一齊嘅時光（標題
慎長.
小妹今年中四，喺中一懵下懵下嘅時候，同一個小學一齊升上嚟嘅男仔一齊咗，拍咗差唔多一年時間。下稱A
我同小學frd同A以前成日一齊打機先慢慢熟咗，到上咗中學嘅時候就覺得自己鍾意咗佢，然後喺某一日膽粗粗就同A表咗白，而佢竟然接受咗。
同A網上傾偈打電話嗰陣我哋咩都講得出，但係到面對面嗰陣兩邊都怕怕醜醜咁，好少嘢講，或者係傾啲好尷尬嘅話題（e.g.你今日上堂感覺點樣、功課多唔多啊之類…）
而A怕醜嘅程度係拖我隻手都唔夠膽，次次都係我主動去拖，可能真係因為年紀細，但嗰陣俾我嘅感覺係：佢連我隻手都唔想拖，好似冇咁鍾意我…
之後有一次，我哋又同翻班小學frd加埋中學frd玩，可能我由細都比較鍾意同男仔玩，就同佢哋傾得好開心，A就開始呷醋，我初頭都唔知，後尾我感覺到佢冇乜點出聲就問佢咩事，A先至同我講咗佢唔鍾意我同男仔玩得咁frd。
原本我都好開心A會為我呷醋，但去到最後我同男仔send幾句msg A都呷醋，再加上啱好係疫情肆虐時期，幾乎冇出過街，又成日因為小事嬲我，於是我就提出分手。
分手之後，我有拍過另一段拖，但直到分手都完全係唔知做過啲咩，完全感受唔到受重視，被在乎嘅感覺，記憶模糊至極。相反，同A做過嘅嘢、有過嘅回憶，事無巨細，我都清晰咁記得，而且嗰心都仲會跳得好快。
時隔兩年，我睇ig嗰陣，見到有A嘅story同post 我都會cap圖然後喺相簿度放大嚟睇，睇好耐都唔捨得碌走，我發現我仲係好鍾意A，我好掛住曾經同佢一齊嘅時光，每逢夜晚只要諗起佢，我就忍唔住想喊，好內疚、好後悔。
細個嘅時候唔識珍惜，到大個咗真係冇機會……係我先將你熾誠嘅心狠心碾碎，而家又可笑咁想將碎片拾回，我知我哋可能朋友都做唔翻，因為我唔配。我全部都明，但我真係好痛苦，我好想你返嚟我身邊，想奢求你嘅原諒，想你同我重新喺埋一齊，我究竟應該點做……
sor for 1999
如果要屌請屌大力啲
麻煩晒咁多位…