#NSS個人
[GUEST] [長文(因為真係好長，所以如果冇興趣嘅話直接skip咗佢啦~)
大家好~小妹今年form 2，有啲困擾 咗我好耐嘅嘢想請教大家🙇
話說小妹由中一升上中二嗰陣知道會有幾個隔離班嘅同學轉過嚟我哋呢班。學期初我哋係跟學號坐，所以我同其中一個新轉入嚟嘅男同學坐得好近。之後都係好似普通朋友咁開始上堂傾偈、一齊笑，到之後慢慢喺ig都有dm一齊傾偈、一齊打機。嗰段時間可以係話小妹最開心，亦都因為咁對佢產生咗啲好感…
之後又調多一次位，真係好好彩咁又坐埋一齊，就變得更加熟，一齊互串又一齊笑。但係小妹冇好好珍惜…
大約上年年尾，佢問我鍾意邊個，由於嗰陣時我對佢都有唔少嘅好感，所以我係抱住一半開玩笑嘅心態再加一半真心，就話畀佢知我鍾意佢…諗住講下冇所謂，或者嚇下佢，但係點知佢好認真，仲特登解釋畀我聽點解我哋唔可以一齊。其實個結果我都預咗，因為我都太急進，我只係想睇下我哋嗰一種關係有冇可能可以令到佢鍾意我(小妹諗太多XD)
但係知道呢個消息唔係最唔開心嘅事 ，而係之後我哋再冇一齊講過嘢，由一開始日日都會只少傾一陣，去到成個月都冇乜交流。其實之後我都有解釋返只係開玩笑，佢都好似微微咁責怪咗我一下之後就冇咩事，但係唔知係咪因為呢樣嘢令到我哋之間多咗層隔膜，好似變得尷尬咗…
小妹真係唔想冇咗呢位朋友，因為我覺得我哋好多地方都有相同嘅喜好， 成日都有共同嘅話題。佢係一位好好嘅朋友，但係因為我一時嘅衝動，而且我根本仲未分清對佢係好感定鍾意，就令佢誤會，令到呢段關係破裂咗
最近開始復課又坐埋一齊，但係講嘅嘢都唔多於五句，覺得上堂靜咗好多，冇好似以前咁堂堂都笑到癲咗。小妹有諗過好多次打電話同佢解釋清楚，想知道佢究竟係點樣諗，但係啲勇氣一到日頭冇咁感性，嗰陣就即刻淆底， 再加上我見而家我哋嘅關係好似有少少嘅轉機，我唔敢再魯莽行事 ，好驚提起呢件事又會令我哋嘅關係再一次消失
所以想喺度問下大家有冇啲好方法(例如直接send呢篇嘢畀佢XD) 小妺好迷茫，亦都令到我嘅情緒低落咗好多， 搞到成日喊，不停怪責自己，小妹真係唔希望失去呢段咁寶貴咁好嘅友誼
(最後以我所知佢有follow呢個page，如果你覺得係講緊你嘅話就send你篇文畀我，然後再講下你嘅感受啦~)
多謝大家睇到呢度🙏我都知好長氣…但係因為真係太唔開心，好後悔，好想搵解決方法。再次多謝大家，祝大家身體健康💪