GUEST

#NSS個人

[GUEST] 長文慎入
小妹今年中三，近呢四年都唔係好開心。所以想求意見…

我覺得我阿爸阿媽有啲衰，我認為我咁諗好不孝，但係我有時真係比佢哋逼到想自殺…

回到正題，我細個嗰陣好開心，阿爸阿媽都對我同細佬好好，（唔好話我淨係記得佢地唔好嘅嘢，我都記得佢地嘅好🤧所以先會覺得自己成個不孝女）佢哋唔會鬧交，我哋都有自己屋企，我真係好多謝佢哋比咗個咁好嘅童年我。

但當我去到小二，佢哋開始鬧交，不過初時都係一日一兩次，我喺房度刪門做功課，雖然有啲驚，夜晚有時發惡夢，但整體冇乜事。去到小三，屋企變得越來越亂，基本上冇位行，所以我，細佬同阿媽去咗婆婆屋企住，直到而家。

去到小五呈分試，我同阿爸阿媽嘅關係都因此越嚟越緊張，我每日都有認真做功課溫書，但當我休息個陣，阿媽無端端就會鬧我日日淨係識睇機，都唔會生性啲嘅，跟住唔比我玩，我有啲崩潰，日日溫書但冇得休息，我好唔開心，所以我之後開始每日做曬功課，溫一陣間書就去玩，考試測驗前幾日先日日夜訓溫，成績依然係頭五名，我覺得無咩分別，但我阿媽不停鬧我，我都識咗駁嘴，我哋幾本上每日都吵好耐，但我多數冷戰。

最恐怖嘅係中學，我已經唔係好鍾意阿媽，同佢一齊會好唔舒服，甚至有啲驚。同時，我擁有咗第一部手機，係阿媽舊個部（iPhone 6x xxxx），用到而家，但佢會改密碼，得返學先可以用，其他時間要問佢開，我已經唔太鍾意咁，但我冇講。既然手機冇咗，咁就用小學買嚟返學用嘅iPad，我先有返啲自由，我開始用佢嚟玩ig，睇漫畫等等，先有返啲日常生活嘅樂趣，但係我阿媽會睇我螢幕使用時間，ig，wts訊息，總之咩都會睇，私隱都冇埋，仲有我一日只睇左兩個鐘機就鬧爆我，我除咗呢兩粒鐘，其他全部溫緊書。而且，我睇咩漫畫聽咩歌都要同佢講，喺自己房（其實係我同另一位屋企人嘅）睇個陣佢都會偷睇，只不過係普通漫畫佢死都要話兒童不宜，跟住沒收，打電話比我阿爸，添油加醋咁投訴我，我好攰⋯

我覺得我地呢頭家已經唔係一家人，阿爸成日工作，工作完之後就會返以前我哋嘅屋企訓，預備聽日返工，如果放假先會上嚟婆婆屋企見下我哋，以前仲會同我&細佬傾下計，玩下，但而家佢上到嚟只係打掃一下，完咗就話辛苦要休息，坐喺梳化打機，我明佢好辛苦，要自己一個日做夜做，但我都好想好似以前咁相處下，我呢排同佢講嘅句子每日唔超過兩句，不過每當我有呢個想法，我就覺得自己好不孝，阿爸已經辛苦工作，我又要求呢樣個樣。而我阿媽呢排因為我地放假日訓夜訓，起咗身就鬧下我地，打機，食飯，繼續訓。

我唔想咁問，但我地係咪真係一家人？打呢個問題個陣我都喊緊，但我真係好想知，我同細佬嘅起居飲食，學習呢排基本都係公公婆婆，一齊住嘅屋企人負責，佢哋比阿爸阿媽仲了解過我地，而阿爸阿媽好似冇乜點過問，我咁講好不孝，但呢啲全部都係我嘅心聲，細佬都有時同我講佢好驚，我唔識點答佢，只係好呆咁話唔使驚。因為我都只係冇表現出嚟，其實我都一樣。我有陣時仲覺得佢哋做父母根本未合格，只會顧成績，鬧我地冇用，有幾次仲話我估佢哋好想生我出嚟架，佢哋好少讚我，最近嘅一次係新年，我記得阿媽話我包裝得盒餅好靚，我記得架，我一直都記得。我好傷心，只係想變返以前咁開心嘅日子，只要係以前嘅爸爸媽媽，我唔要其他嘢都可以

另外，我本身已經冇咩朋友，得一個最好嘅，但而家唔同班，我喺班上只有幾個唔算熟嘅朋友，學校教嘅嘢又開始難，老師更加係唔掂，所以要靠自己，（希望唔好再有更多入學受害者）但我數學兩次都唔合格，靠平時分先拉到返嚟，我而家先至中三，以後點算？只有同我個frd(下稱C)一齊先令我覺得安心，我真係好鍾意C，大部分時間都係佢先可以令我覺得放心同開心，同其他人一齊我會感到驚，有時仲有手震（我覺得自己好唔正常），總之，學業同人際關係嘅壓力都令我覺得校園生活好恐怖，我真係唔太鍾意返學，好恐怖，而且一諗起要對住成班勁過我，又唔熟嘅人，真係好驚😖

對唔住咁多位，我篇文好多重複嘅字，但我真係差唔多日日夜晚都不安到喊，瞓唔到，所以先有呢篇亂七八糟，斷斷續續打左五日嘅嘢。