#NSS愛情
[GUEST] Hello～大家好嗎？希望武肺下大家都好好的。
是咁的，我中一個陣同一個男仔同班，佢係好靜個種男仔，我係比較鍾意同人傾偈嘅女仔，所以好自然咁成日撩佢傾下偈，慢慢咁佢都開始會理我、同我講下笑，亦開始會同其他同學交流，中一個段時間都幾開心，幾懷念。😂
到中二同中三個陣好可惜咁無同到班，本以為就算唔同班都起碼見面會打下招呼，但無奈地換來嘅係一次又一次嘅無視，就算我主動同佢打招呼佢都係直行直過，我當下嘅心情好唔開心，唔識形容個種好唔舒服嘅感覺。明明中一仲好地地，可能我唔想無左個朋友掛？
但之後有次經過佢班房，見到佢同一個女仔靠得好埋，第一次見到佢笑得咁開心…見到個一下，我唔知點解好失落，好想問下佢地係咩關係，但我根本冇問嘅資格，話唔定佢已經唔記得左我係邊個。個次之後我就再都無主動搵過佢，係走廊、佢班房、課外活動見到佢，都好似陌生人咁。個時我有種好唔捨得嘅感覺，好奇怪。
到左中四，唔知應該話有緣份定點，我地又同班。今次一對就要對三年，開學第一日見到佢嘅身影，莫名開心左一下，但一諗返之前望到嘅場景，又再一次失落。係人地口中得知原來佢中二同三個陣一直都好安靜，身邊冇咩朋友，都唔太同人傾偈，個女仔成日問佢英文，所以佢地先成日會係埋一齊，我知道之後好似鬆左啖氣咁。
好神奇地，我同佢坐得好近，我坐佢前面。我調完位之後，即刻同佢打招呼問佢點解之前唔理我，佢完全唔理我，但呢個反應係我意料之內，所以我又好似中一咁，厚面皮咁成日撩佢傾偈、煩住佢，有咩唔識都問佢，由一開始唔太理我，到之後佢會主動同我講野。我好開心可以變返之前咁，慢慢地，我會特登早啲起身返學就係為左同佢同一班車，同佢傾偈會好想時間暫停，小息會特登留係班房煩住佢，變得好留意佢，我諗自己好似鍾意左佢..？我冇同任何人講我嘅感受，最好嘅朋友都冇，因為我唔鍾意分享自己嘅心事。
到左下學期，老師調左位，今次我離佢好遠，坐佢附近係我嘅好朋友。事情好戲劇，我朋友鍾意左佢，當佢同我講佢鍾意左個男仔個陣，我個心好似碎左咁，但我只可以笑住講祝佢成功。我朋友話：「你同佢咁friend，幫下我啊？」，我都好想幫佢，但我做到最盡嘅就係同佢保持距離，因為我知我唔保持距離，我會越陷越深。佢係我最好最好嘅朋友，陪住我過最唔開心嘅日子，我唔想因為愛情而失去佢，所以我選擇放棄。望住佢追個男仔，望住佢成功得手，望住我同男仔嘅距離再一次變得好遠好遠。
由佢唔會同人講野，到主動同我講野。
由佢唔會記得人名，到淨係記得我個名，再幫我改埋花名。
由我一開始純粹只係想令佢可以更融入社交圈子，到莫名奇妙咁鍾意左佢。
成個過程，好突然。
曾經以為我係特別個個，但後來發現，其實也不過如此，係我誤會左。如果可以返返去，我會揀唔同你講野。
中六啦，畢業啦，有緣再見啦。：）
但我一直都想知道，
其實你有冇一刻鍾意過我？
一刻，就足夠。