#NSS個人
[灣仔女校] 長文
今日投稿係嚟分享吓我最近嘅事嘅…
我曾經有一位好朋友（下稱E），中一嗰年我地真係好friend。
中一第一日翻學，我見到佢同佢周圍d人傾計明星傾得好開心，可能因為佢嘅人格魅力，我中學之後第一個目標就係同佢做朋友。於是當年嘅我用咗一個禮拜嘅時間，睇晒佢idol啲嘢（真係入咗坑），嘗試同佢有共同話題。之後放學做左啲柒事，同佢展開咗第一次對話，佢走左之後，淨翻我一個留喺班房度傻笑，我真係好開心自己竟然撩倒佢同我講嘢。
於是，過咗幾個月之後我哋同埋另一個粉絲（下稱D）就變咗friend啦，日日傾我哋粉嘅韓團。
唔知點解嗰陣時我同埋E特別多嘢講，可能wts得多掛？
我性格比較孤僻，個陣得佢哋兩個friend，而佢兩個都係超外向嗰種人，所以D成日都會同其他朋友食飯。而E，明明可以同其他朋友食外賣，偏偏佢每個lunch都陪我去食canteen。我唔知e隻係叫做對朋友嘅依賴定係我個陣突然鍾意咗佢，總之感覺好奇怪。
後來我地班有人ship 我同E嘅CP，低能到呢，佢地話E係攻，我係受(¿)，見到佢好唔鍾意，唔知幾時我試過走出去鬧人定唔知走去打交，之後佢地先停。但後來E同D俾人shipCP，我好似有d呷醋，先發現我對E產生咗佔有慾…
但為咗避嫌，我下學期末段開始同E疏遠咗好多好多。暑假我地都幾乎無講過嘢。
但中二三四嗰幾年我同E真係完全疏遠左，E同D同班，但我班房喺一樓，佢哋班房係三樓，於是我哋成年都冇聯絡過，嗰陣我同自己講，揀科啦，唔好理咁多啦。
今年，我突然之間又同返E一班，但我已經唔識同佢相處啦，呢幾年佢變得太多啦，佢周圍都係朋友，仲成日同D&其他佢嘅朋友又攬又抱添。
最近有份music project要寫歌，我問E可唔可以同佢一組，得咗，但我已經知道我地無可能翻以前咁friend啦。我地講嘢尷尷尬尬咁，頂多講十句就傾唔倒落去啦…
有時候覺得自己都幾賤，當年中一推開佢嘅係我，之後呷醋嘅又係我，話放棄唔可以再諗佢嘅又係我，同同學講我只係太依賴佢e個朋友嘅又係我，但懷疑自己鍾意咗佢嘅又係我，唔想影響佢嘅又係我，唔夠膽聯絡佢嘅又係我，想同佢變翻朋友嘅又係我…
然後就搞成咁，我唔知自己對佢已經係咩諗法。前幾日，我夢見E，夢裡面我地依然係朋友。
我從來無試過對另一個人有咁複雜嘅感情。雖然E唔喺幾我審美，但奇怪嘅係我覺得佢好可愛，見到佢我就好開心(?)
我發生緊咩事？
但我可能即將要轉校…我唔知，我究竟應唔應該同E聯絡翻…我感性個邊叫我同翻佢做朋友，但理想個邊又叫我唔好，喺好想同佢維持關係同時，又怕自己會突然需要離開，好似中一咁，又要推開佢，我好似，應該默默咁睇住佢就算啦…雖然懦弱..但總比受傷好
寫完有種心已死嘅感覺，曾經我為佢，立志成為物理治療師，但佢好似已經唔需要我啦，我諗係時候為自己諗吓，搵個新目標啦，但係E啊，我真係睇你唔透，你究竟….唉，算啦，我終究都係會錯過你…
或者，我希望，有一日，我可以再次收到你send密碼俾我，裏面，係一句我想講嘅，可唔可以做翻朋友？
友情，定係愛情？
無所謂啦，反正無論答案係乜，我都會願意保護你、陪伴你，永遠愛你。