#NSS個人
[GUEST]
見到有關食煙個post，有人話食煙減壓係藉口，我想講幾句(段)。同時我煙齡尚淺，只能講出少部分人心聲，歡迎留言補充。
但講之前我簡單介紹吓自己先，我係應屆dse考生，女，已成年，有食煙習慣但都係一星期唔過十支，我係有意維持呢個數字嘅。我覺得煙好臭，大多數時間都會執返煙頭抌垃圾桶，會盡量去沒人/人少嘅地方食，唔做火車頭。
我咁介紹自己唔係想令大家覺得我有公德心或者幫食煙嘅人洗白。而係想講唔係個個食煙嘅都係四圍害人嘅賤格自私精，總有人係有盡量為人設想但又想暫時離開煩惱向煙草訴苦。但係我都明白有好多人因為飽受煙味折磨而生活質素下降，我明白，無理據亦無意去說服。
言歸正傳，咁究竟點解唔用其他方法減壓，寧願傷害自己？通常人地講嘅其他方法係指聽歌,做運動,打拳,打機,同朋友傾訴之類。作為有壓力就想食返支煙嘅人嚟講，我可以斷言：以上冇一種方法優勝過食煙。當然你地講所講嘅方法確係都比食煙健康，你知，我知，食煙嘅人都知。但點解絕大部分食煙嘅人都選擇繼續食煙而唔係用上述方法代替呢?
除咗有尼古丁令人上癮嘅加持外，仲因為嗰啲正面嘅減壓方法比起食煙喺即時效果上嚟講仲要遜色。請容許我用返上述方法解釋：首先，我唔想有晒時間嘅感覺。雖然我成日都晒緊自己時間(例如仲有廿日考dse我仲係半夜打呢篇廢文)，但係我想食嗰陣已經感到壓力，我仲喺唔想浪費時間嘅時候浪費時間只要令我更焦慮。想聽音樂解減，咁就會放下手頭上嘅嘢好好享受音樂，我都相信唔會一兩首歌就減到壓，起碼半個鐘。我好多嘢做唔切就嚟癲很大壓力點算？乜都唔做聽半個鐘音樂。我肯我個腦都唔肯啦，因為就算係我鐘意嘅歌都只會令我覺得好吵好煩。咩做運動打拳傾計都一樣，唔啱mood為做而做就只會煩上加煩同埋浪費時間。相反，一支煙慢慢食可能只需兩分鐘。
其次，我懶。我好懶。我精神上好攰，就算仲有體力都唔想四圍郁，因為冇動力。做運動留返係得閒又精力充沛嘅時候做先有效率。又頹又攰嗰陣有呢啲時間我不如瞓返陣。做咩我做做吓嘢無啦啦要搞到自己又臭又多汗又攰又肌肉痠痛。我長期係屋企都算啦，打工仔點算？可能你會話 冇人叫你一有壓力就去做，咁我要忍幾耐？攞起包煙同火機，出門口吹吓風靜吓個人反而冇咁多嘢搞，甚至只係轉個環境用最舒服嘅姿勢坐係路邊嘅凳度食返支都幾chill。
再者，我無錢。我嘅case嚟講每個月用係煙度嘅嘅錢除返開其實唔多，大概係有三,四日唔記得食平民早餐嘅價錢。其實話晒仲算學生，買嗰刻點都有啲肉赤嘅，不過係我自己選擇，就算我要掉錢落垃圾桶都係自己承受返後果，冇人搶我錢。唯一好撚黑人憎係要俾稅政府，真係好似搶錢咁。(sorry for 1999)但相比起join打拳plan,gym嘅會費平好多。我亦都唔想浪費錢係聽歌app度，因為一唔用就有壓力同內疚感，好似晒咗咁，但煙仔唔會唔食就消失！
最後，呢段係針對同人傾訴係比食煙更有效減壓呢個說法嘅。好簡單，我唔想講。唔係人人都可以對朋友打開心房，都唔係人人有呢啲朋友。一個願意接納你嘅負面情緒，唔會打斷你講自己嘢，唔會講你嘅嘢俾人聽，知道你需要解決辦法定安慰，唔會講難聽說話，唔會有價值觀衝突嘅朋友。咁或者可以同陌生人傾？嗯聽落唔錯，但我唔知人地係咪真係想聽。反正我又唔想講，不如都係食支煙仲好啦。
煙的確好傷好臭，甚至我望到啲老煙剷，我唔明白點解佢地仲生存到，但我而家需要佢，因為食煙嘅感覺係無可取代(*除咗草)，用文字形容唔出，我硬要形容嘅話大概係喺我沙漠行緊嗰陣有人用噴壺噴水落我塊好乾嘅臉咁，都係冇水飲但係我會好過啲。不過我又希望我身邊嘅人可以多啲珍惜自己，呢世都唔好食。我亦知道我終有一日會用完青春嘅本錢，食煙嘅缺點變得肉眼可見，我遲早都係會選擇搣甩佢。不過就當我係咁短視啦，為咗而家可以令我好過啲，我暫時會繼續同煙仔做朋友。
*好個人嘅個人意見
半夜失眠打嘅，有啲迷迷糊糊，可能部分文句不通，希望睇得明🙏🏻
sorry for 1999 and 語境不一 and 文筆差 and冇懶人包