#NSS其他
[GUEST] 小妹今年F2，一直俾一件事煩到個心好亂，成日都諗起呢件事令到我覺得好後悔。
件事係咁嘅，小妹喺小學四年級嗰陣識咗個朋友，先叫佢做A，A唔鍾意班上面一個同學（叫佢做B），因為我係A嘅朋友，所以A唔鍾意佢，我就覺得我都唔鍾意佢（我地冇打過人，但係每次同佢講嘢個語氣都唔好，宜家諗起唔知算唔算排擠）嗰陣我已經覺得咁樣做唔好，但係因為我當時係A嘅朋友，所以覺得佢講咩我都要撐佢，附和佢，差唔多成年都係咁。
但係到咗五年級我同A分咗去唔同嘅班，A就冇再同我講過嘢，我搵佢佢都唔理我，而因為有相同嘅興趣，我同B做咗最好嘅朋友，直到小學畢業，我覺得我地嘅關係都好好，但係小學一畢業唔夠幾個月，B就突然刪哂我同佢之間嘅所有聯繫方式，點搵都搵唔到佢，甚至連社交軟件都拉黑咗我，嗰陣真係成個人呆住哂，明明話好疫情完咗之後就一齊出去玩。
幾日之後佢突然拉番我其中一個聯繫方式出嚟，講咗句sorry，我同佢講：有咩事你可以同我講，但係唔好突然拉黑我。之後佢再冇覆過我。
過幾個月之後我決定去搵佢傾吓，解決呢件事，我喺WhatsApp度搵佢，但係佢直接扮成自己爸爸，問我係邊個，我當時100%肯定嗰個人係佢，無論係語氣、用詞、定係emoji，都係佢平時最習慣用嘅，但係佢點都話唔知我係邊個，嗰陣嘅我覺得，既然佢係都要扮唔識我嘅話，點問都唔會講㗎啦，咁不如就唔再搵佢，費事佢又覺得我煩，於是我地就一直冇再聯絡，冇再傾計。
唔知點解，呢件事過得越耐，我就越容易諗起，如果嗰陣我冇同A一直排擠佢，我地會唔會到宜家都仲係朋友呢？特別係呢幾個月，身邊識得越多人越覺得對唔住佢，如果嗰陣我再成熟少少，有啲自己嘅想法，有冇可能 就唔會跟住A一齊對B講出嗰啲唔好嘅話呢？
因為呢件事最近冇乜胃口食飯，覺又瞓唔好，做咩都冇精神，係度諗呢件事，好想同佢道歉又唔敢去搵佢，請問我宜家應該點做？
感謝Admin❤️