#NSS家庭
[GUEST] Hello大家好 我係#NSS211113E 嘅樓主
多謝大家嘅留言❤️我估唔到原來陌生人嘅
一個心心或者攬攬emoji已經令我好開心
原來呢個世界上真係有人會
毫無理由咁關心另一個人(๑･̑◡･̑๑)
–
好啦既然我又投稿即係代表我又有問題了:(
前幾日我同媽媽去食飯之後行下超級市場
當中行街嘅過程我都見到
有啲野有興趣想買例如衫之類
之後媽媽都同我講話
「等你第日大個返工有錢先自己去買」
咁我都死死氣繼續行街算
之後我係超級市場見到有朱古力零食嗰啲
就求媽媽買俾我
最後媽媽都買咗但冇幾耐就義正嚴詞咁同我講：
「你唔可以一直向人哋索取！你要學識付出！婆婆公公俾你利是你唔好次次都收，佢哋老人家啲錢你唔好攞。出到嚟社會唔可以咁自私…….」
咁個下我係有啲心虛嘅，畢竟我的確會收利是同埋要屋企人幫我比錢，每個月我都係有攞零用錢嘅:(
–
之後我覺得有啲唔開心
點解其他小朋友嘅父母都會買小朋友想要嘅嘢
滿足佢哋嘅願望例如玩具之類
但係我想要某啲嘢嘅話就一定要係靠我自己？
細個係咁，而家都係咁
之前個post講過我細個好窮
所以冇咩機會有新玩具玩
而家呢刻我覺得我好似細個嘅自己
去一啲好大型嘅商場見到有好多好吸引嘅嘢
屋企人都係唔會幫我買
而係叫我努力讀書自己大個返工儲錢買
我唔係話埋怨話點解屋企人唔幫我買嘢嗰啲
–
只係呢一刻我將「物質」「付出」同「愛」掛勾咗
我忍唔住喺度諗屋企人以前就話係因為窮
但而家明明有能力都唔肯幫我買嘢
係咪即係代表佢哋唔愛我
如果唔係點解其他人嘅父母都會幫佢哋買嘢
作為父母唔係應該會愛自己嘅仔女咩？
我知道咁樣諗嘅自己好自私
明明父母都有佢哋嘅難處但係我覺得自己好缺乏愛屋企人話我凈係識一味索取
但我仲係覺得自己好貧乏
我唔知點樣付出愛
我甚至覺得我擁有嘅嘢比其他人少太多
我係咪真係太過貪心同自私？