#NSS學校
[插班生係罪人？] 訴苦長文，sor for 1999
中三那年我因為校園欺凌而轉校，我知道我係逃避緊，冇去面對或者解決問題，但係我真係冇一份勇氣去面對佢哋。
處理人際關係對我而言係一件好艱難嘅事，當我轉到新學校嘅時候，我滿心期待住新同學新環境，亦都係我一個新嘅開始，我一開始嘅目標係識多啲朋友，好好讀書，勇敢一啲，但最後呢三項裏面，「識多啲朋友」係已經完全放棄。
當我入到呢間學校嘅時候，大家已經有各自嘅圈子，佢哋並唔歡迎新人，當我鼓起勇氣去同佢地打招呼嘅時候，佢哋只會對你視若無睹，佢哋會開始標籤你為「插班生」，喺佢哋口中「x班嗰個插班生」，我嘅名字並不複雜，只有筆劃簡單嘅三隻字，但係要用「x班嗰個插班生」取代我嘅名字。
遠遠不止如此，每次小組討論或者活動分組，我永遠都係多出來的那一個，我有嘗試過搵人同我一組，他們嘅藉口永遠係「下，我哋呢邊換咗人啦」，但其實大家清楚個組人數未滿，佢哋只係唔想同我一組，結果我大部份小組時間都在廁所偷玩手機，或者在學校到處走走。
到咗小息嘅時候，我只有三個選擇，第一 坐喺自己嘅座位做功課，第二 坐喺自己嘅座位瞓覺，第三 坐喺自己嘅座位發呆，三選一直到小息完咗，繼續上堂。
以上都仲未係最糟糕，到左驗證自己讀書成果嘅時候（即係考試派卷），當我攞到一個唔好嘅成績，我只會受到佢地嘅嘲諷，攞住佢哋高我一兩分嘅成績嚟比較，但我攞到一個唔錯嘅成績，我只會被大家當作敵人 仇家般對待。
講得好聽啲嘅叫獨立，實際啲嘅叫孤僻，我除咗要面對呢班同學嘅冷漠對待，我仲要面對老師 社工嘅好言相勸，每隔幾日班主任走來同我講「你要嘗試多啲同 同學相處」其實唔係我唔想同佢地相處，亦都唔係冇嘗試過，即係無論如何，佢哋都唔願意去接納我。
我慢慢開始反省，係咪我的問題，係我人緣唔好定係我唔識同人相處。
其實少啲爾虞我詐，勾心鬥角，地球會唔會毁滅，唔好成日將啲事搞到咁複雜，我唔想返個學都可以演變成喺後宮爭寵咁。
其實我只不過係一個好普通嘅插班生，我冇做過啲咩，只係想識多啲朋友，好好讀書，勇敢一啲，但點解可以咁難。
嚟緊5月3號開始面授課程，又要返學校去面對呢一切，真係完全唔想返學，唔係唔鍾意讀書，而係唔想見到呢一班人。