#NSS個人
[GUEST] 大家好，小弟半年前移民咗去馬來西亞。打呢篇文純粹想搵個地方呻下。可能好多人會問點解係馬來西亞，點解唔係英國，澳洲，加拿大等等呢啲多數香港人去嘅國家。其實都唔到我決定，成件事都係我老竇提出，原因主要都係唔鐘意個正苦啦。（In case大家唔知，馬來西亞有一部分人口都係華人）首先，由於我媽唔識英文，所以一開始都係諗緊台灣或者馬拉，費事佢過到去好似坐監咁，起碼歪歪地都講到啲。第二，我屋企人都到咗退休年紀，馬拉啲物價比較低。第三，我老竇驚「今日香港，明日台灣」。結果就揀咗馬來西亞。
我對呢個國家係完全0認識，所以我一開始都有啲擔心，驚唔適應當地嘅環境。同埋係香港生活咗咁多年，唔捨得離開呢度。但係身邊啲人都係話走得就好走，唔係個個都咁幸運可以走，令到我都唔敢講啲咩，唯有順其自然，見步行步。
過到嚟之後，見到好多唔同嘅面孔，又印度，又華人，又馬拉人，唔係個個人都溝通到，佢哋唔係每個都識英文，所以都幾麻煩。然後呢度啲人多數都係揸私家車，條街想搵個人都搵唔到，然後我成家人又唔識揸車，搞到出入好唔方便，要叫車，就算附近都要十蚊起跳。呢度啲樓都好舊，大多數係地屋，仲要岩岩巉巉。啲嘢食又冇香港咁好食，啲菜又唔新鮮，肉又嚡熠熠，仲要好多辣嘢。設施又冇香港咁好，冇乜體育場所。
我喺度讀緊國際學校year10，一級得一班，一班仲要得十幾個人，我個班超過一半都係馬來西亞本地人。我唔知國際學校係咁少人定係點，總之我就覺得好怪。我本身英文唔算話太好，佢哋仲要每個人個tone同accent都唔同，搞到我都幾難適應。但係好彩之前係讀英中，都叫勉強應付到。然後有五六個同學識講普通話，平時有睇開台灣片所以自問講普通話都算中上，起碼佢哋聽得明，但係佢哋講得超快同埋有啲用語都唔同，搞到我有時聽唔明。不過呢度每個人都好nice，我有啲咩唔明同困難佢哋都好有耐性咁幫我，熱情到一個點。但係共同topic就真係冇乜，講嚟講去都係三篤屁。我後尾仲識咗一個大我一級嘅香港人，好似嚟咗差唔多三年，聽得出佢講廣東話有幾多懶音，好驚隔多幾年我都會變成佢咁，因為我除咗同屋企人講廣東話之外都冇乜點講。
最後有一個困擾咗我幾耐嘅嘢，首先呢度寫大馬簡體同講普通話，但係呢啲我都明白同respect因為呢啲係佢哋從小學嘅嘢，佢哋冇得揀。不過個問題係佢哋都用大陸嘢，佢哋會用微信，小紅書，微博，tiktok，甚至大陸版抖音，（嗰啲唔係華人嘅同學都會用微信同tiktok）。然後佢哋都聽大陸嘅歌，大陸嘅劇集，成日見到佢哋睇埋咩芒果tv，騰訊電影，乜乜衛視之類嘅嘢。最big brain嘅係有一個同學同我講第時想去中国讀大學同發展，仲話中国係一個好地方畀年輕人打拼事業，好繁榮……唔講仲以為自己移民咗返大陸。我有同佢講咗下我嘅立場，點知佢同我講安安靜靜做個快樂嘅居民，don’t care about the policy…….我都唔知講咩好。最近仲見到有第二個華人fd po ig story send微博啲嘢講烏俄戰爭係烏克蘭問題。唉，個心都悒埋。我唔知佢哋全部係個別例子定係點，因為我知黃明志支持民主，令到我一開始仲以為呢度大多數人都係添。我覺得成件事真係好矛盾，我因為唔鍾意大陸先移民，但係而家好似同去咗大陸無分別。令我開始懷疑一本passport係咪真係咁重要，如果我喺香港應該會開心過呢度幾倍，起碼話題同語言都同聲同氣。我真係好掛住香港，希望之後嘅香港可以變返自由嘅香港。
多謝大家睇到呢度，第一次投稿，有咩講得唔好屌細力啲
Sorry for 1999