#NSS家庭
[Guest] #長文慎入
我好討厭自已嘅屋企人，因為自己好注重係同人地嘅情感度，所以有時會好介意係一啲小事度，例如啲咩大大聲睇電視，唔理我係咪温緊書，又或者係明明有屬於自己嘅匙羹唔用，會用我個匙羹。但由於同屋企人關係唔太好，好多嘢都唔會講出口，即使係講咗佢都唔改。
有時對住屋企人會覺得好攰，點解作為一個母親，我參加咗5年嘅活動你可以唔記得我星期幾有堂，點解你一個月淨係比500蚊我要我搞掂自己嘅一日3餐，可能你覺得我唔洗返學點會用到咁多錢，但有時同朋友食幾次飯就用曬，當然我唔會問你拎錢，因為我記得你話過我好晒錢，用係我身上全部都係錢。
好感謝係細細個個時妳比我去公園挽，雖然我知道你嘅目的只係想避開我係屋企嘅父親，但大概個時我係最中意你。去到小4我跌咗落差班，我仲記得你知道之後有幾嬲，個時比你拎條藤條打到隻腳紅晒。小5我升反去好啲個班你同我講，老師冇人升先升你，唔係你操行比其他人好。升中排位我去咗間band 3 你明明唔知band3係咩，但你知道唔係同我啲朋友同一間之後，你嬲到即刻帶我去叩門，我個時係喊住口咁答巴士，直到個日夜晚你都係嬲緊我。
我好慶幸升咗上中學之後，考試卷唔洗簽名，因為我好怕你，每次你見到我嘅分數都係嬲，唔簽。每次比你鬧我點解會考咁差，你總係一邊等我答一邊做自已嘢，個時我淨係驚到唔敢出聲，係度喊，但你總係會同我講，喊死埋一邊唔好喊比我聽到。
有時我亦都會怨恨我嘅母親，明明我細細個就有藝術感，點解你係都要我讀書，唔栽培下。到依家想拎返起呢個天賦，反而同人地差咗一大截，但聽到我又贏到比賽又咁開心，係咪因為只係得呢樣嘢可以值得驕傲。我知道大家會同我講，我依家努力就會追得返，呢個唔係佢嘅問題，但有啲嘢遲咗起步已經冇咗好多基礎。
去到依家，我同母親嘅關係因為政治而更加僵硬。畢竟，我一次都冇聽過你嘅對唔住，或者係讚賞，每次鬧交都係我嘅錯，每次我話係我問題，對唔住我錯晒，你都係唔滿意，會話我講得好晦氣。即使係一齊食飯，都唔會講嘢。就算係佢開話題，我都要諗吓講乜佢先唔會鬧我，久而久之我淨係識hea下佢，唔想講嘢，食飯都帶AirPods 。
我唔中意我嘅母親，但佢比咗好多嘅自由我，我去邊都唔洗報備，凌晨2點反都唔會比人鬧，依家我講粗口佢都唔再管，我出去食又唔洗打電話同佢講唔返黎食。我開始享受冇人管嘅感受，亦都習慣一個人生活，好多謝你唔再管我。
原先仲想寫下我其他屋企人，但算啦等下次唔開心嘅時候再寫，好多謝大家願意睇我放負。大概我寫緊呢篇野嘅時候我屋企人可能又話緊我^_^。
#sorfor1999