#NSS學校
[GUEST] 屋企窮，俾同學笑
小弟今年year3，自細屋企窮，住公屋，小學揀屋企附近屋村學校，大個小小就揀搭兩個站屋村學校。自細屋企窮，爸爸媽媽係我小學一早離婚，我揀媽媽一齊住，媽媽做左家庭主婦好耐，離婚後就開始做飲食業，供我讀書，屋企有得攞綜援，都算勉強可以過到落去。點解我跟我媽媽？因為當時太細，邊會唸跟邊個錢多，只是覺得媽媽需要我多啲。
小學同學身邊冇咩人笑我屋企窮，依家都有約出黎玩；中學開始發現身邊屋企個個都屋企比較有錢，有啲學生名牌手錶，年年換手機。而我一個書包著六年，手機都係iphone6s用左好耐。 有時候中學同學笑我係唔係屋企冇錢換電話？我話：我自己冇咩錢，我想換自己去搵，而且手機仲用得。平時我都係出街拖鞋，背心，短褲。就算衫爛小小補翻算。
我大約中四開始翻暑期工，多數日頭做下功課，夜晚翻工，一開始做M記多，M記黎講多學生，識到啲人都比較成熟，冇介意對方家底。我通常都會食m記啲包算，費事浪費錢。
學校啲雜費，書簿費我都係自己交，每次問阿媽攞錢我真係心痛，好似好大壓力，我知佢一定會俾。我最記得我去交書簿費果日2000蚊，我20張100蚊咁俾佢，我有個同學笑我屋企冇大張紙？
我其實讀書唔勁，band2尾學校讀書勁既人好少，而且我又唔係精英班。中五個時冇努力溫書，得數學比較高分，其他科一般，英文差到冇朋友，成日唔合格。
直到屋企有次阿媽病左，都繼續翻工，怕屋企冇收入，先開始認真讀書。我果班成績中下游，全級都係得6，7個入到大學，而且全部都係菁英班裡面。我開頭中六都覺得自己冇可能入到大學，班主任就同我講：我屋企之前都好窮架，你覺得你自己唔得？我得你點解唔得？你和我唔一樣？ 之後日日係學校班房留到7點溫書，啲同學打擊我：算啦，你估你自己真係入到？精英班都係得幾個，你覺得你自己有可能咩？ 類似之類說話，之後又有一啲同學笑我屋企冇地方溫書？
之後中六影畢業相，我件校服爛左，補翻有啲痕，有個同學笑我屋企窮冇錢買校服，又笑我褲腳短，唔啱著。其實我皮鞋👞都已經開始褪色，我覺得反正最後一年著得就著咯，費事浪費錢。
直到中六放榜果日，連我自己都懵左，3科5**，中英通332，好似全級dse我第3個高分。我開頭以為自己入唔到，之後揀左hku個engineer算。之後放榜果日，中學同學笑我：你以為你自己入到大學好勁咩，依家贊錢好易姐，入到又唔代表啲咩，入唔到贊錢先勁。 但佢地有啲科攞1，要讀基礎文憑。
之後謝師宴佢地個個買MacBook，我買部普通百老匯notebook算，佢地笑我連macbook都買唔起。我話：我自己交到功課就得啦。
我依家唸起都覺得自己好似發緊夢，尤其我英文好差，我以為我攞2已經算好。其實我中學果段期間真係覺得自己好7，屋企窮，平時係學校校服又短又爛，鞋又褪色，係學校俾人笑左六年。但依家唸翻起，覺得自己咁7都挨到落去，又真係幾型！
不過一直以來都係多謝我老師教得我好好，佢話俾我聽：（個頭濕左，吹翻干佢咪又幾型。7完再型，你型到爆💥。吃得苦中苦，方為人上人；苦盡甘來。）佢叫我時刻記住之前的生活。