#NSS家庭
[Guest] Hello, 今日我嚟講下我嘅故事，同埋想求意見。
講下背景先。我有一個細佬。爸爸長期喺大陸做野(雖然佢係黃，但做埋啲嘢好似大陸人，好乞人憎，唔知係咪喺大陸stay 耐左) ，媽媽係家庭主婦。
喺今年年頭，我阿爸喺大陸返左嚟，係為左同我阿媽離婚。有一晚佢地喺度鬧交，嘈醒左我。一開始我都唔知咩事，佢地嘈完之後阿爸就返左入房。我就趁機去廁所(忍左好耐) ，去完之後我阿媽就問我係咪聽到曬？我話聽到少少。之後佢就入左我間房同我講咩事，佢講返除左結婚後嘅頭幾年，其餘嘅時間我阿爸都對佢唔太好。我阿媽一直都想修補，但換嚟嘅係佢嘅冷淡。佢唔知我阿爸出面有冇女人(因為喺大陸做野媽咪睇唔到) ，佢問過阿爸，但佢否認，話分開係因為唔夾，仲話好似影響到我地生活。我阿媽講完後喊左，佢話原來佢一直都蒙在鼓裏。但佢話唔會同我阿爸離婚，因為要保障我哋。之後有幾日嘅夜晚佢都有搵我傾，亦都再喊。其實我自己聽完都唔係好舒服，但我明我係佢唯一一個信得過嘅人，所以我都選擇聆聽。
除左上面嗰件事，仲發生一件對我黎講都幾心痛嘅事。我細佬係個智力有障礙嘅人，平時功課都要花多啲時間去做，遇到啲困難嘅題目都要花多啲時間去講解捭佢聽。有一次佢有功課唔識做，咁啱我同阿媽都唔得閒去教佢，所以就叫左阿爸教。但佢教得好恐怖，一有錯就打佢，最後打到佢喊，大脾仲瘀咗一噠。我嗰陣其實聽到見到，但我唔夠膽叫佢停。之後我同我阿媽傾返其實我好內疚，無好好保護佢。我細佬都好錫好阿爸，成日畫公仔送捭佢。我想像唔到佢捭一個佢咁錫嘅人，嗰個仲要係佢阿爸，搞到咁會幾傷心、幾大陰影。
上個月我阿爸打電話返嚟搵我哋，我接電話嘅時候佢同我講：「我好掛住你呀。講真其實我都唔係好掛住XXX(我細佬) 㗎咋。」(其實仲講左其他傷害佢嘅說話，但我唔記得) 但嗰陣我細佬企左喺我隔離，佢聽到曬。我聽完之後呆左咁望住我細佬，佢都靜左。咁樣一次又一次傷害佢，我見到佢咁都明佢有幾唔開心。
再講下有關媽咪嘅事。屋企一直以嚟都好窮，阿爸亦都好賤，一遇到啲咩問題就掉捭我阿媽去解決，所以阿媽真係一個撐起成頭家。上年，阿媽隻手傷左。佢一掂到凍野又或者拎重野，啲手指就會痛/郁唔到。有一次我哋唔生性，唔幫手拎嘢，搞到佢啲手指又郁唔到，佢就同我地講：「你地可唔可以乖啲？如果可以我都想照顧你地一世。」我聽完之後喊，因為之前阿媽同我嘅關係都唔太好，我覺得佢唔愛我，因為同我啲朋友比，我的確無佢地咁好。但而家諗返都覺得自己好衰，淨係諗佢衰嘢。由細到大只要係我想食嘅嘢，佢都會買捭我(我其實好易滿足，我食到想食嘅已經好開心)。
經過左以上嘅事件，其實我同阿媽嘅關係好左唔少，我變得識得體諒佢。以前佢鬧我，我都會好嬲，甚至會喊，但而家捭佢鬧完，雖然都係嬲，但會叫自己冷靜，諗下佢幾辛苦，然後將件事做好佢。我近排亦都有問鋼琴老師關於鋼琴兼職嘅事(我學琴)，因為想16歲做兼職資助下屋企(其實阿爸長期無收入，我都唔知佢返工做乜)。之後鋼琴老師同我媽咪講我近排對兼職好有興趣，我阿媽知道之後同我講，你讀好書，上大學先出嚟做野啦。我明白學歷好重要，我自己都想讀大學，但我知佢辛苦，所以想幫輕下。我想嘗試下兩邊兼顧，預左會辛苦，但我都想做。所以想徵求下大眾意見，我咁樣做係咪真係好又或者我可以點做，但我唔可以袖手旁觀。
最後一件事啦。我阿爸由我細個開始都對我好好，可以話係偏心我得好緊要。但我唔係好鐘意，因為我會不安同埋我細佬會唔開心，所以我都盡量避免我哋三個喺一齊嘅情況。加上佢又煙又酒，令我更加唔想接近佢(我好討厭)。而且加埋上述事件，令到我更加反感。本來我以為佢上返去做野就無乜野，唔理佢就得。但我聽完之後，我就覺得我好不孝。佢咁錫我，我又唔睬佢，又咁樣諗佢，我好似好衰。我亦都唔想等佢病左/過世先後悔，而家珍惜仲嚟得切，但我唔知點去面對佢。佢始終都係我爸爸，我唔可以咁樣。我好迷茫，唔知點算。希望有人可以瞭解到我嘅情況，再話捭我聽我應該點做。
終於講完啦。都收埋左好耐。多謝大家睇我咁長篇大論嘅嘢，同埋原諒下我講野1999。希望大家可以將你地嘅意見留低，話捭我聽我可以/應該點做。多謝🙇🏻♀️🙏🏻