#NSS愛情
[GUEST] 超長文注意
小妹F3，因為肥咗少少而令男朋友飛我，甚至人人都憎我，我好內疚。
我由細到大都肥，一直都唔在意，少運動又成日食肥膩嘢。舊年，157cm/58kg 嘅我有咗鍾意嘅同班男同學，下稱A，佢同我係朋友，但我一定配唔上靚仔又瘦嘅佢，於是我決定減肥，飲食控制、有氧運動同肌肉訓練令我4個月瘦咗10kg。期間我又修整過眉毛同髮型、又開始注重護膚、每晚都做雙眼皮、高鼻嘅按摩，甚至飲豆漿+按摩，由A cup變C cup，朋友都話我靚咗。
今個學年初，A話原本見我讀書認真，已經覺得我唔普通，見到我咁努力改善自己，已經被我吸引，於是向我表白，一齊咗，一開始好sweet。
上次考試，我自己要求高，溫書夜瞓，但壓力大又忍唔到口，心諗下次再減，但又冇時間做運動。考完試嘅聖誕食咗好多大餐，聖誕後一磅，反彈肥咗5kg，我冇高過，睇落去明顯肥咗。
1月嘅時候，我已經努力做運動，但阿爸阿媽唔再俾我斷食/夜晚戒碳水，我忙住補習又做功課搞到夜瞓，所以成效唔大，呢個時候A好似冷淡咗。佢小息成日有原因唔陪我，例如要去陪兄弟溫書。我仲係好鍾意佢，唔想因為自己黐身而令佢唔鍾意我，所以我只可以容許佢去。
不幸嘅事嚟喇，有次A喺小息帶咗個高瘦靚嘅F4女仔入嚟，下稱B，B同我班好多人friend。當時課室少人，佢一入嚟就拍我枱同我講：「死肥婆，我兩年前開始識A，我鍾意A先㗎，你溝佢咩玩法呀？」我話：「佢主動同我一齊，我一直唔知你嘅存在！我係冇錯㗎！冇人會預留佢俾你㗎！」A一直企喺B嗰邊，無論係物理上，定係心理上。突然，B打咗我塊面一下，佢哋兩個走咗。我終於不忍流出眼淚，我唔知係因為受刺激，定係因為心靈痛苦。我唔敢向老師講，如果我告B，我隨時冇晒朋友。
第二日，件事傳到成班都知，同B同我都唔熟嘅人冇理到，但有幾個人開始唱衰我：「臭雞，你搶B嘅男朋友喎，你有咩好講？」「你咁樣衰，以為有人會鍾意你？我一直好憎你呀，減肥啦！」當時呢啲說話，加上被佢哋孤立，令我開始討厭返學，到平息咗，我身邊只剩低幾個知心朋友撐我，但我而家開始出現身材焦慮症狀，好易發脾氣，日日都唔開心。
每日我好自卑，身材臃腫嘅我少咗食嘢，連酵素都食埋，但減肥仲係停滯緊，可能因為我遺傳體質係瘦唔到，我唔知，淨係知道自己感覺每日都活喺黑暗，呢種黑暗唔係最近天氣嘅黑暗。我感覺自己身材係醜嘅，我冇做錯其他嘢，就係咁冇人要我喇。
我真係好愛A㗎，點解無端端有隻臭雞搶咗佢？如果我當初唔食咁多，係咪就唔會咁？想問有冇天生肥底嘅人可以分享下減肥方法？