#NSS家庭
[Guest] *長文慎入
有個仆街老竇嘅我應該點做？
話說小妹啱啱喺八月移民，喺嗰邊二月鳩升中一，宜家暫住喺老竇朋友屋企，而我哋本身睇緊樓。
交代返背景，我宜家十二歲，一直都係同爸爸分居，同媽媽住，所以母女之間感情唔錯。
喺七歲前，我每個週末都會見老竇，
但係自從嗰次佢鬧我鬧到關係破裂，我哋就冇再見，就係咁過左四五年，佢甚少參與我嘅童年。
嗰次嘅衝突其實都令我好驚佢，記得嗰陣時我長髮及腰，佢就無啦啦睇唔順眼要我剪到及肩，
但我嗰陣時喺小學俾同學笑肥，於是就覺得長髮嘅形象可以蓋過「肥」，而且顯得塊面冇咁大，
以為咁樣就可以令班人收聲，唔再笑我。
但佢就係咁鬧我「姣婆」「想勾引男人」，嗰陣時嘅我真係承受唔住，
喊住跪低求佢唔好逼我剪頭髮，因為我好驚情況會變得更差，佢就點都聽唔入耳，
喺伯伯同老母嘅勸說下佢至停咗火。
留意返，我哋宜家都只係和好左幾個月。
身為一個老年「大男人」，佢絕對唔會聽其他人意見，如果質疑佢嘅睇法，就會俾佢屌都渣都冇得剩，正正因為咁，我哋兩母女同佢好多磨擦。
喺睇樓方面已經好明顯睇得出，大家追求嘅生活模式大相逕庭：老竇係一個守財奴，怕麻煩，
慳得好過火，係堅寒酸；老母都慳，不過就合理地慳。
舉個例子：我老竇覺得買咩都嘥錢，
老母買廁紙、沐浴露、潤唇膏呢啲必需品都比佢鬧，
而且佢唔止因為「嘥」而鬧人，乜都可以鬧一餐，
好似攞老婆黎出氣咁，
咁我媽日日比人鬧，梗係唔開心啦，
佢又唔想對老竇發脾氣，話搞大件事對大家都唔好
其實老母有抑鬱、偏頭痛同其他情緒病，移民逼使佢要減藥，我都幾擔心佢嘅病情加重。
但老竇始終都係喺自己世界入面打緊飛機，唔知係咪典型天蠍嘅關係，
堅持己見就以為係為緊對方好，真係好難頂。
所以我想喺度問吓，如果佢往後都係咁，我有咩辦法可以喺唔傷感情嘅前提下，同佢好好哋傾？
唔想再靠老母同佢溝通，我真係好想佢認清事實，但佢係咪已經冇得救？
我未來六年點算好？
多謝睇到最後嘅大家同Admin！Sor for 1999🙏🙏