#NSS家庭
[GUEST] 我有一個大我幾年嘅家姐，由細到大我都係比佢蝦，我認我自己係細膽唔敢反駁佢，但當佢愈大開始做野搵錢嘅時候，對我同屋企人勁差，成日同我地鬧交，將番工唔開心嘅野全部發洩落我地到。
好記得細個個陣，佢因為晏晝要睇住我，冇得同朋友出街玩就會成日埋怨我，話我搞到佢冇得出街。有時可能唔小心激嬲佢，佢就會鎖我入房，唔比我出嚟，話唔想見到我同埋我阻住佢。因為個陣好細個，所以覺得件事好合理，亦都唔敢反抗。
好啦依家大個左，就係言語上嘅攻擊。明明只係好小嘅事，小小意見不合我講番清楚，講事實，佢就會話我好激動，駁嘴冇禮貌，之後叫我收聲，話唔想聽到我把聲。每一次佢放工番嚟，我地成家就要受佢氣，只有佢心情好嘅時候先會同我地講野。個日心情唔好佢就會發脾氣，語氣勁差。如果我聽唔到佢講咩就會話我聾，但我個陣溫緊書，根本冇留心佢講嘅野。每一次佢鬧我，要承受嘅野真係好多。香港學生讀書已經大壓力，番到屋企每做一個動作，講嘅每一樣野都要諗過，如果唔係就會比佢話。我已經試過唔知幾多次因為比佢鬧，好委屈而喊，因為有時根本唔係我錯，佢永遠都唔識得喺人地角度諗下，覺得自己冇錯，埋怨人。
講真，我真係唔覺得佢係我家姐，因為我地唔會傾計，又唔會一齊出街，大家有咩事都唔會同對方講，亦只會話我做妹嘅做得好差，但係背後我遷就過你幾多次，做左幾多野你又知唔知？所以我真係好羨慕各位有一個好錫你嘅兄弟姊妹，大家真係要珍惜。
多謝睇到呢到嘅各位🥲🙇🏻♀️本人中文好差，有睇唔明嘅位記得原諒我🥲